Panton Aceh / Cinta Lam Lumpoe

     ~"Cinta Lam Lumpoe"~

Bungoeng sijalôh, meu bôh seureungga
Timoh meu banja, rata meuligoe
Hana tòm gadôh, wajah adinda
Sideh lam dada, gata kupasoe

'Öh ban lheuh subôh, beungöh jiteuka
Loen èh lam kamba, ingat keu adoe
Badan sang keubôh, ban si seulingka
Seuliyõ mata, rap teungeut keudroe

Sang-sang su kréh krôh, sidèh di luwa
Aléh keuh puetra, rasa cukop toe
Langsong loen beudôh, pintö meu buka
Rupa jih dinda, yang katróh sampoe

Karap teu gantôh, bak loen eu rupa
pue keuh di mata, ka salah pantoe
'Öh ban di urôh, haba keuluwa
Uloen nyoe dinda, ji seu'öt sigoe

Mata loen séh sôh, ku tanyoeng sigra
pakôn adinda, keunoe tróh sampoe
Meubèk keuh neupôh, wahé kakanda
Uloen tróh teuka, bukôn jak meulhoe

Bungoeng sijalôh, ka kumang rupa
Kumbang jeulita, tan tróh meu sigoe
Maka loen beudôh, ban subôh buta
Rindu keu kanda, han ék peutheun droe

Dak jeut bèk gadôh, hubungan cinta
Geutanyoe duwa, bèk putóh taloe
Sabè dalam jrôh, bèk na keundala
Si panjang masa, bèk kachoe baloe

Han mungkén gadôh, jaweub kakanda
Ikatan cinta, ta peukong taloe
Tanyoe peu sabôh, hubungan cinta
Bèk mala-mala, sampé seuleusoe

Bèk sampé reulôh, bahtera cinta
Beu goet neu jaga, wahé e adoe
Meubèk neu kôh-kôh, ikatan loen ba
Beungèh kakanda, han èk neu jangkoe

Ji gröp-gröp bakôh, di cõng bak naga
Gabuek cèm pala, di cõng bak raboe
Dari phõn subôh, tanyoe meu haba
Sampé ka sinja, golom seuleusoe

Bèk lé meu urôh, wahé adinda
Geutanyoe duwa, ta meumat jaroe
Jinoe ta beudôh, ta meu'èn duwa
U manohara, ta meu jak sigoe

Teuma di pat tôh, nyan manohara
Tanyoeng adinda, sira khèm sigoe
Meubèk neu satôh, wahé adinda
Neu kalôn nyata, 'öh katróh sampoe

Langsong meu côh-côh, di beudôh dinda
Beh jak hai kanda, hawa loen tuloe
Ta èk beu jrôh-jrôh, seu'oet kakanda
Di ateuh honda, tanyoe meu sahoe

Seunang han gadôh, ban tróh bak pinta
Di manohara, ureung meu ranjoe
Na yang tiek dagôh, di mieng kuala
Na yang meu cinta, rata jeut sagoe

Kamoe jak téh tôh, laju lé sigra
Duwa ngon dinda, jak manoe sigoe
Riyeuk seu meupôh, meupusèng gisa
Kamoe nyoe duwa, galak that tuloe

Lam riyeuk krèh krôh, kamoe that mesra
Khèm-khèm beraya, sapue tan pakoe
Uloen teu gantôh, aléh ngon puetra
Saket that raya, ka luka asoe

Lam riyeuk krèh krôh, u loen nom sigra
Rupa jih nuga, di yuep meu ranjoe
'Öh ban loen beudôh, ka dalam tika
Cukop that gura, bit keubit paloe

Ku piké bit jroh, kisah ngon dinda
Rupa jih cinta, dalam meu lumpoe
Butoi that teubôh, kisah loen rasa
Teuka keucewa, bé gunong janthoe

'Öh noe u loen kôh, kisah peumada
Watè na masa, ta sambõng rampoe
Meunyoe na reulôh, haba lam rika
Meu'ah lon pinta, ta meumat jaroe

                 Karya: Cek Wandy