Hikayat Aceh | Hiem Lam Panton|

Assalamu'alaikum, rakan sahabat
Saleum yang meuhat, nibak phon kisah
Ulon meujangeun, neu izin siat
Meuheut ulon that, lage peupatah

Pusaka jameun, keubit bereh that
Sunggoh bit hebat, riwayat kisah
Mubek neuhireun, wahe sahabat
Ka meunan meuhat, adat daerah

Galak dum ureung, tuleh hikayat
Kata geu peukap, pakiban yang pah
Siseun dua seun, kata geu ikat
'Oh wate siap, bit-bit cukop pah

Ladom di ureung, galak hikayat
Pue-pue geulihat, geu peugot kisah
Na chiet di ureung, galak hikayat,
Hobby cukop brat, meubaca kisah

Meumacam-macam, karangan meuhat
Ikat meu ikat, kata meu olah
Ladom na nazam, bentuk hikayat
Ladom sahabat, caé geupeugah

Walau le macam, bentuk hikayat
Asoe lam ikat, meu ujong kisah
Judul awalan, taboh yang teupat
Meunyangkot leugat, yang taneuk peugah

Yang ladom rakan, peugot hikayat
Masalah adat, geupeugot kisah
Na chiet di rakan, yang cukop gawat
Peugot hikayat, meukana jihah

Na seubagian, peugot hikayat
Tentang nasehat, butoi ngon salah
Ladom keumarang, keubit bereh that
Cinta siat-at, geutakat kisah

Le that macam, karangan ikat
Kiban yang meuhat, meuheut tapeugah
Lage lon tuan, contoh ibarat
Galak hikayat, meumacam kisah

'Oh mangat badan, meunoe meu ikat
'Oh troh keurawat, meudeh meu peugah
Teuma hai rakan, uroe nyoe meuhat
Laen lon ikat, di dalam kisah

Saboh pertanyaan, ku gulé ligat
Keumandum sahbat, yang baca kisah
Deungoe hai rakan, deungon beugot that
Supaya mupat, bek silap peugah

Dipermulaan, nibak phoen ayat
Dalam surat, AL-Baqarah
Buka AL-QUR'AN, aci neulihat
Lhee bõh meuhat, yang ka deuh jeulah

Baréh jih pih tan, hana ta tupat
Peudeung meujungkat, yang deuh sep jeulah
Kiban pakiban, tabaca meuhat
Bek sampe silap, tabaca salah

Huruf mulaan, 'Alif' yang tupat
Diteungoh meuhat, 'Lam' kadeuh jeulah
Keuneulheuh rakan, huruf 'Mim' leugat
Lhee bõh meuhat, huruf hijayyah

Hoe-hoe yang tangieng, wahe sahabat
rata jeut teumpat, mesjid meunasah
'Alif' 'Lam' 'Mim', laju geu takat,
Meu alon ayat, geubaca bagah

Peujeut keuh meunan, geubaca leugat
Seudangkan ayat, barèh tan jeulah
Paken han teuman, laen geu takat
'A' 'La' 'Ma' meuhat, laju geupeugah

Ulon neuk tanyong, bak rakan sahbat
Kiban keuh meuhat, aci neusurah
Agam ngon inong, aci neujawab
Neuplôh beutupat, yang tan deuh jeulah

nyô 'Alif' 'Lam' Mim', bacaan teupat
Neu atô siat, mandum beujeulah
Nyô kon 'Alif' 'Lam' 'Mim', bacaan ayat
Kiban keuh meuhat, aci neupeugah

'Oh noe meumada, haba hikayat
Meuah keuh leugat, meunyoe na salah
Kadang na haba, ulon yang silap
Neuteugor siat, pat-pat hana pah

Maklum lon tuan, wahe sahabat
Ilmee kureung that, meunan lon peugah
Sikula pih tan, jak beut sep gawat
Ulon grop kawat, lon plueng di dayah.

                                  Karya: Cek Wandy

Panton Aceh Peuingat || DARA JINOE

            Dara Jinoë

Kurek anoë, bineh pasi
Pula campi, timoh lada
Dara jinoë, hati hati
Le that janji, pura pura

Ngon geutanyoë, ji meujanji
Laen laki, ji meu cinta
Bek neu deungoë, wahe akhi
Le that bukti, ka deuh nyata

Keudeh keunoë, di grak gaki
Ji peu reugi, jak tamasya
Dalam anoë, meu-en giti
Bineh pasi, meu-en wawa

Dara pungoë, nyang meunan hi
Peunteng hepi, bahagia
Kabeh leungoë, jaroë gaki
Teulhoh gari, cikok ruda

Meunan jinoë, tamse lon bi
Dalam rawi, peutrôh haba
Meu'ah kamoë, dara tari
Bek neutaki, ulon hamba

Meudeh meunoë, haba lon bi
Lon padoli, bek bahaya
Teuma jinoë, gantoë bunyi
Buhue rawi, ulon tuka

Meunyoë bunoë, ujong bak i
Pakhok jibi, u wateuh a
Jadeh jinoë, pakhok rawi
Ah ta ili, mate bak a

Neuci deungoë, asoë rawi
Laen versi, neuci baca
Salah ngon nyoë, haba neubi
Neujok bukti, kiban nyata

Manyang pante, pasi keudah
Laôt ceurah, aceh jeumpa
Mubek dige, dara ceudah
Nyang lon peugah, bukon dinda

Ureung laen, yang lon peugah
Nyang deuh jeulah, bak prohaba
Jimeukawen, tanna nikah
Katrôh meugah, umalaya

Meunyoë dinda, kadeuh jeulah
Hana salah, nibak kanda
Bak buet dausa, larang Allah
Hantom pernah, meunan rupa

Maka kanda, galak leumpah
Hana salah, pileh dara
Mameh muka, dara ceudah
Hate ceurah, tan brok sangka

Bek keuh beungeh, dara ceudah
Nyang lon peugah, teugor sapa
Bek meu neh-neh, nyan ie babah
Euntreuk teulah, wahe dinda

Kamoë agam, serba salah
Ulèë tanpah, ubat hana
Meunyoë apam, kajipeuhah
Rhôt keu piyah, dak ulama

Meunan tamse, kanda peugah
Dara ceudah, ingat beuna
Pulang pike, kiban yang pah
Nyan teu seurah, kiban makna

Yoh goh sampe, pike bagah
Dudoë teulah, hana guna
Bek rôh sampe, bak buet salah
Malèë ayah, deungon poma

'Oh nan cae, dalam kisah
Mudah mudah, jeut peunawa
Meu'ah ju le, nyoë na salah
Deungon ikhlah, dausa bekna.

Karya: Cek Wandy

Panton Cinta|Meurayu|

Si pucok labu, keumang meubanja
Si pucok lada, keumang meuriti
Oh wate lon eu, gata adinda
Sunggoh that beda, 'oh lon peurati

Mata pih sayu, bulat ngon muka
Hidong meucula, leusong ngon pipi
Ulon teuharu, pandangan mata
Galak ji teuka, di dalam hati

Kon lon meurayu, gata hai dinda
Beutoi bit nyata, haba ulon bi
Ka sigoe minggu, lon lumpoe gata
Maka troh teuka, meu jakba bukti

Sabe lon rindu, wajah adinda
Malam ngon sinja, 'an supot hari
Bukon ngon nafsu, gata lon cinta
Seupeunoh jiwa, kuasa rabbi

Bek neukheun sapeu, keulon hai dinda
Meuyoe tan cinta, jawapan tabri
Lon harap laju, ka nibak gata
Tabalah cinta, beusaban isi

Meuyoe seutuju, neujok ju haba
Supaya leuga, ulon lam hati
Mangat bek leusu, jantong ngon dada
Ucapan cinta, seumoga jadi

Masak putik u, timoh bak mula
Geukheun u muda, sibeuleun hari
Moga seutuju, cinta ulon ba
Lon preh adinda, tamat bajuri.

Karya: Cek Wandy

JANTONG MEULINDE - HATE KA LUKA

Rincong meu uke, tajam that mata
Biok meuraba, langsong meucureh
Jantong meulinde, hate ka luka
Jibeudoh tanda, urat meugareh

Dara boh hate, yg ulon damba
Ka gop po jeumba, laju di sideh
Wate lon pike, singke lam dada
Ureung lon cinta, kisah ka habeh

Hantroh meusampe, meurumoh tangga
Kana keundala, teuka meulanggeh
Na sidroe toke, sok dagar kaya
Deungon avanza, dijak koh lipeh

Jurus keumawe, rayuan jiba
Hingga teugoda, cut adek puteh
Jitem laju le, hubungan cinta
Jikidep mata, meunoe ngon meudeh

Meuyoe lon pike, cara logika
Aneh bin gura, apa beurandeh
Di dalam hate, ulon syok sangka
Dara lon cinta, keunong peungaseh

Maka meurawe, ji peugah haba
Na baca-baca, apa beurandeh
Tiep uroe sabe, tan pre geu ba ba
Pakat beulanja, jak bloe-bloe kuweh

Keubit weuh hate, yang ulon rasa
Keu lon jilupa, oleh si gadeh
Jituri han le, 'oh meukeu muka
Sunggoh keucewa, hate lon seudeh

Baroe kon sabe, keu lon di cinta
Janji meupesta, 'oh tamat tambeh
Jinoe laju le, jibalek haba
Hubungan cinta, jipeugah kabeh

Geureu'op bace, lam abah daka
Teukijot kadra, dicatok bileh
Cinta hana le, ka putoh duwa
Meupuseng gisa, sayang ngon gaseh

Mandum ka cebre, rindu lam dada
Hubungan cinta, jituka pileh
Ka 'oh noe sampe, nasib lon rasa
Ka 'oh noe kada, ka lheuh meutuleh

Walau lam hate, ulon keucewa
Teutap meu saba, ngon hate lipeh
Lage nyoe sabe, kayem lon rasa
Chiet ka biasa, dada meucureh

'Oh noe meusampe, kisah lon rika
Malam kajula, ulon meuneuk eh
Nyo teupeh hate, meusinde haba
Meuah lon pinta, ban sigom wareh.

Karya: Cek Wandy

MUBEI DUA JAB

             
                      Pengarang: Cek Wandy

Keudidi meukap, meujungkat iku
Ciluet meulagu, jitarek silek
Mubei dua jab, keubit that lucu
Meukeu mubei bu, meu likot bei ek

Contoh ibarat, umpama keubeu
Sideh lampoh u, teumpat piyoh hek
Asai ka silap, hana deuh taeu,
Jilompat pageu, hana meukeutek

Keunoe ji peurap, meuyoe tan karu
Keudeh ji peukeu, meuyoe ka cuwek
Ji minah teumpat, 'oh tan le sapeu
Hana ta teupeu, seucara rilek

Seucara endap, tanyoe di tinju
Kon jurus kungfu, atawa silek
Jurus mujarab, binti keurabu
Sigoe ji sinteu, laju meuprek-prek

Abah meukhap-khap, meujungkat iku
Hana deuh lampu, mata meublek-blek
Badan keurawat, urat meusiseu
Lam paru-paru, nafah ka meulek

Wate ka sehat, baro deuh laku
'Oh ban ta teupeu, kalheuh ji gledek
Saket keubit brat, yang meunan laku
Ngon parang cincu, tanyoe di tek-tek

Beu teugoh that-that, rakan sigitu
Bek jipeulaku, jilabô ngon ek
Mubei dua jab, gawat bin hantu
Ngon pha geulungku, yang pah tatipek

Mubei dua jab, hikayat buntu
'Oh noe keuh laju, jaroe ku gesek
Meu'ah sahabat, nyo salah sinteu
Kadang meulalu, haba dua krek.

°°° WEUH DALAM HATE °°°

Cek Wandy

Riyeuk di pante..meu uke rawa,
Meupuseng gisa..geulumbang tajam,
WeuH DaLaM HaTe..hana tom reuda,
Kayem ji teuka..uroe ngon malam,

Meunan keuh sabe..yang ulon rasa,
 Keubit that gura..lagenyan macam,
Bak ulon pike..masalah cinta,
 Mumang teurasa..sang karap pitam,

 Adek boh hate..jioh dimata,
 Ka gop po jeumba..buet laen agam,
 Gaseh ka cebre..sayang ka reuda,
 Ka gadoh cinta..janji yoh silam,

Hana neupreh le..troh ulon gisa,
 Ngon laen cinta.. neu tuka reugam
Janji ta uke..yoh nyan adinda,
 Neupreh lon gisa..di nanggroe batam,

Ek sampe hate..gata adinda,
 Janji ta bungka..sigra ta padam,
Ka teutôp mate..pintô rôt cinta,
 Han le neubuka..luwa ngon dalam

 Seudeh bukon le..yang ulon rasa,
 Sunggoh keucewa..lagenyan macam,
 Saket hana pre..ulon tiep masa,
 Di dalam dada..jadeh sang karam

  Keubit ta pike..yang meunan cara,
  Meurana teuka..keubit that tajam
  Seumagat tan le..'oh ta keurija,
  Kupi ngon bada..rasa boh mamplam

  Suwah tapike..tamita cara,
  Bek meundeurita..lagenyan ragam,
 Jinoe laju le, ta akhe cinta,
 Yoh golom dada, infeksi dalam


Karya: Cek Wandy

Putoh Harapan

  sibungong peukan..pucok ka layu,
cabeung ngon ukheu..mandum kapatah,
PuToH HaRaPaN..badan sang pilu,
jantong jimusu..hate bit gundah,

gaseh ngon sayang..ka tan le laku,
cinta ngon rindu..hana soe balah,
bungong pujaan..karang meujampu,
teungoh ta sibu..dirôt le gajah,

meunan tamselan..ulon boh miseu,
rata dum taeu..lagenyan kisah,
 janji saboh jan..beusatu padu,
saboh putik u..dua tanyoe plah,

  janji cut intan..ulon teuharu,
bujuk ngon rayu..keubit that indah,
sampe lon tuan..teukhem ngon bak u,
lembut deungon su..kata ta peugah,

seunang hana ban..lon deungo rayu,
janji sep hayeu..di dalam kisah,
 hate lon tuan..sang-sang meurindu,
adak jeut laju..bagah meunikah,

riyeuk meuhantam..bakat jimusu,
beurawang lalu..teuga sileumpah,
janji ucapan..cut intan meulu,
dalam si minggu..mandum meu ubah,

 gaseh kabeh lham, sayang ka ragu
 cinta ngon rindu..kabeh meu ubah,
 janji yoh silam..yang ka tapadu,
meuputie iku..uram tan jeulah,

 gura hana ban..oh akhe taeu,
sunggoh terlalu..bit keubit parah,
lon pike santan..puteh ban susu,
oh ulon teupeu..apui hu mirah,

sunggoh that keujam..cut intat meulu,
lage bak gitue..bahaya leumpah,
duroe sep tajam..bit keubit cincu,
sigoe jilalu..jitubiet darah,

 oh keunong simban..saket meu 'u-'u,
 ulee ngon iku..meutamah parah,
 seuluroh badan..teurasa kaku,
 ceukang hana su..'oh tahah babah,

lagenyan macam..cut intan meulu,
 peurangui keubeu..seureuta gajah,
 janji neu hantam..ka sigoe sapeu,
pucok ngon iku..meubalek kisah,

 hingga lon tuwan..teurasa pilu,
janji yang lalu..ka gata ubah,
 putoh harapan..'oh lon deungo su,
 meuribee minggu..hate lon gundah,

uroe ngon malam..meulang-lang rindu,
pinto meu pageu..hana le teuhah,
 meu macam-macam, ragam deuh laku
 hate bit pilu..jantong ka susah.

 'oh noe hai rakan..karang lon rireu,
singoh lom ukeu..ta sambong kisah,
meuah lon tuwan..rakan sigitu,
kadang meulalu..haba lon salah.

       Karya: Cek Wandy





Kategori

 • Pengertian, Ciri Dan Jenis Panton

 • Panton Meurayu

 • Jantong Meulinde - Hate Ka luka

 • Hana Lon Sangka

 • Meurana Baten

 • Nasib Lam Rantoe

 • Mantong Lam Lajang

 • Tarek Pukat

 • Hikayat Sultan Iskandar Muda Deungon Raja Malaka

 • Hikayat Sultan Iskandar Muda Deungon Raja Rom

 • Dara Jinoe

 • Mubei Dua Jab

 • Weuh Dalam Hate

 • Panton Teuka-Teuki(jawaban)

 • Panton teuka-Teuki/Hiem

 • Hikayat Aceh / Hiem Lam Panton

 • Panton Uroe Raya Idul Fitri 1435 H / 2014

 • Panton Uroe Raya Idul Fitri

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??

TAREK PUKAT

       Pengarang: Pantai Blang Kijue

Salam 'alaikum,,ummy ngon
teungku,
Baroh ngon timu,,tunong ngon
barat,
Pakiban haba,,rakan sigitu,
Ban peut penjuru,,pakiban
meuhat,

Geulumbang bicah,,riyeuk
jimusue,
Eungkot meulangue,,di dalam
bakat,
Bacut ta kisah,,laot blang kijue,
Mangat ta tupue,,kiban di
tempat,

Memang sep luwah,,laot blang
kijue,
Dari phon tambue,,panterheng
meuhat,
Eh nan keuh batah,,luwah oh
taeu,
Batah u timu,,ka deungon barat,

Jinoe ta peugah,,kisah yang taeu,
Teuntang blang kijue,,dalam
hareukat,
Teutap lon peugah,,walau
neuteupue,
Tanpa na ragu,,haba lon ikat,

Memang ka meugah,,kisah blang
kijue,
Disinan taeu,,bah TAREK PUKAT,
Ban beungoh beukah,,sit ka
meunuju,
Siap peurahu,,untuk hareukat,

Kamoe seuleu'ah,,barat ngon
timu,
Deungo ji musu,,eungkot ji
loncat,
Asai ka leumah,,'oh wate taeu,
Pawang bak iku,,kajeut tiek
pukat,

Ngon bagah bagah,,gisa
peurahu,
Dayong meubahue,,deugon
teuga that,
Bek sampe lupah,,kawan jilalu,
Beu awai ukeu,,tasiseu pukat,

Meuyo ka jeulah,,eugkot deuh
taeu,
Puta peurahu,,ule u darat,
Tarek beubagah,,meu iku iku,
Ki'ieung seulingkue,,cuwayè
ikat,

Beusigoe langkah,,beusatu padu,
Supaya sulu,,oh ji'èk pukat,
Bek talö siblah,,peulampong
taeu,
Mubek meulalu,,tarek teuga that,

Asai kabeh pah,,oh wate taeu,
Beusare laju,,tahuyat leugat,
Meunyoe ka lupah,,mui sirang
ukeu,
Tanda ka breuh bu,,ka teungoh
pukat,

Puncong ta peuhah,,tabuka laju,
Beusama taeu,,sigoe talihat,
Meunyoe na mudah,,cit ka
tatupue,
Eungkot jimusue,,jigrop grop
loncat,

Eugkot khan gapah,,jimet met
iku,
Di Eugkot rambeu..abah meutat-tat
Peusapat bagah,,lam raga
tahue,
Keutoke pangku,,tapubloe ligat,

'Oh noe keuh kisah,,dile lon
rireu,
Ta samboñg ukeu,,meunyoe na
sihat,
Meunyoe na salah,,kisah lam
layeu,
Meuah hai teungku,,ban
latih hikayat.

Hana Lon Sangka

Riyeuk dipante..meu uke rawa,
Bineh kuala..teuka ie cikoe,
Hana lon pike..hana lon sangka,
Rupa jih gata..keulon ka tuwoe,

Rôt jalur hape..hana le haba,
Lewat udara..ka meusyokoloe,
Ek sampe hate..wahe e dinda,
Ulon tasiksa..lagenyoe bagoe,

Gaseh ka cebre..rindu meutuka,
Sayang ulon ba..benci neugantoe,
Seudeh lam hate..yang ulon rasa,
Sep mendeurita..di dalam rantoe,

Teu ingat sabe..keuwajah gata,
'Oh malam jula..teulumpoe-lumpoe,
Mubalek hate..nibak adinda,
Ulon ta lupa..malam ngon uroe,

Teu ingat tan le..meu ube cupa,
Pakôn adinda..ek meunan sampoe,
Di dalam hate..ulon teusiksa,
Tijoh ie mata..rap punoh jaroe,

Meunyoe bit tan le..sayang bak gata,
Hana lon paksa..gata hai adoe,
Tajak laju le..hoe-hoe yang hawa,
Moga bahgia..adinda sidroe,

Pisah 'oh akhe..ngon gata dinda,
Lon paleng muka..meu lambai jaroe,
Han meureumpok le..geutanyoe duwa,
Meu'ah lon pinta..dosa yang dudoe,

Di dalam ca'e..lon peutroh haba,
Moga neubaca..neurasa keudroe,
Ngon leupie hate..ulon meurika,
Meuah beu raya..nyô salah rampoe.

       Karya: Cek Wandy

Yang Teukaèt;

 • Pengertian, Ciri Dan Jenis Panton

 • Panton Meurayu

 • Jantong Meulinde - Hate Ka luka

 • Putoh Harapan


 • Meurana Baten

 • Nasib Lam Rantoe

 • Mantong Lam Lajang

 • Tarek Pukat

 • Hikayat Sultan Iskandar Muda Deungon Raja Malaka

 • Hikayat Sultan Iskandar Muda Deungon Raja Rom

 • Dara Jinoe

 • Mubei Dua Jab

 • Weuh Dalam Hate

 • Panton Teuka-Teuki(jawaban)

 • Panton teuka-Teuki/Hiem

 • Hikayat Aceh / Hiem Lam Panton

 • Panton Uroe Raya Idul Fitri 1435 H / 2014

 • Panton Uroe Raya Idul Fitri

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??