Pengarang; Cek Wandy
eungkot mirah, kidep mata
eungkot cuka, dhuep-dhuep jantong
lon neuk peugah, kisah cinta
agam dara, lon neuk kunjong
dalam kisah, rawi rika
neuci baca, hai rakan long
galak leumpah, meu-en cinta
peugah haba, dalam jurong
adek aisyah, tari rupa
jak sikula, dilhok nibong
ngon bang dolah, meu-en cinta
ureung kaya, toke jagong
galak leumpah, saban cinta
hana dawa, uram ujong
di bang dolah, janji jiba
tamat kula, nikah langsong
adek aisyah, seunang raya
deungoe haba, toke jagong
jeumot leumpah, jak sikula
bahagia, leupie jantong
bungoeng cidah, patah duwa
ukheu bungka, bungong murong
ka meu ubah, kisah cinta
kajeut dawa, uram ujong
janji nikah, yoh nyan duwa
ka ji tunda, toke jagong
abang dolah, tulak cinta
gara-gara, mabok bakong
adek aisyah, seungkak dada
ka keucewa, alah polong
teuka teulah, ube raya
hate goga, saket jantong
sapue tan pah, ta keurija
kisah cinta, putoh ujong
adek aisyah, rhet ie mata
bebe raya, rhet ie hidong
hate susah, malam jula
mendeurita, yang ta tanggong
adek aisyah, hate luka
ube raya, ka jiranggong
aneuk siwah, cong bak pala
cong meuria, uleu seudong
dibang dolah, rilek saja
laen dara, geuneuk sambong
hana susah, dalam jiwa
kisah cinta, puta arong
bagah-bagah, peugah cinta
bak dek tia, awak geudong
lagak wajah, adek tia
tari rupa, hidong mancong
ngon dek aisyah, jioh beda
taeu rupa, meuhi lutong
mata siblah, ube raya
malam jula, meuhi burong
beda leumpah, ngon dek tia
blek-blek mata, laju dilong
'oh noe kisah, lon peumada
kisah nyata, bukon eumbong
nyo na salah, dalam rika
meuah sigra, hai peungunjong.
note;
ureung droeneuh meunyoe meuneuk copy panton nyoe, jeut neu ubah kata-kata jih yang bak akhe kalimat alinea keu neulheuh, na keuh bareh keu peut bak akhe nyan yaitu hai peungunjong. peungunjong nyan jeut chiet neutuka galak-galak droeneuh pue-pue saja yang cocok.
contoh;
~meu'ah sigra, hai neu usong
~meu'ah sigra, yang that lambong
~meu'ah sigra, ju neusinthong
~
meu'ah sigra, pat yang sirong
