Panton / Cae Sambot Buleun Ramadhan Terbaru Tahun 2020

          "BULEUN RAMADHAN"
          ("Buleun Ta Préh-Préh")

Meugeudhum su bôm, lam utôm sawét
Beureutôh jagét, meujahét ban cèh
Salam'alaikôm, nibak phôn bayét
Saleuëm si cumpét, hana lôn puwèh

Syukô keu Allah, seuluwah bukét
Nyang peujeut sakét, puléh sigoë pèh
Laôt geukubah, luwah meu liwét
Eungkôt meulét-lét, han habéh bijèh

Seulaweut saleuëm, takheun sigoë blét
Hana meupuwét, Nabi nyang taprèh
Nabi Muhammad, Rahmat meukandét (meutindéh-lapéh)
Akhé geubangkét, bèk ta peukabèh

Keu Al sahabat, meuhat ulôn wét
Ka geutem jak lét, kaphé beu di wèh
Hana geu ingat, mangat deungön phét
Kaphé geusungkét, geutak bak marèh

Horeumat lôn bri, sitali lilét
Meukali kubét, seuniman Atjèh
Keu gurèë seuni, ahli meu rakét
Macam geu kayét, ca-e beu pasèh

Di ureuëng baca, sép kha nyoë lawét
Dikap lé pijét, hana meudalèh
Meunyoë meucakra, pha-pha meusingklét
Asai lam bayèt, bandum beu berèh

Keumukaddimah, amanah walêt
Beuna sigoë glét, mangat jeut sahèh
Lheuh nyan ta pinah, tangah sigoë pét
Hoë laen tawét, keubhah ta prèh-prèh

Deungön Bismillah, Allah nyang wahét
Bandum geu seupét, meunyang peu elèh
Meusoë nyang salah, jeulah geu cupét
Asoë ngön kulét, jeut geu peumeungklèh

Ramadhan katrôh, sunggôh teungku bét
Meutigét-tigét, baca taseubèh
Beu ta peujiôh, brôh-brôh seurahét
Bèk jeut peunyakét, wahe teungku lèh

Ta pubuet surôh, bèk rôh meupalét
Bèk ngön jen afrét, ta meungön jadèh
Puasa beutrôh, bèk pajôh supét
Bèk ta peusulét, tajak teurawèh

Beule seudeukah, ikhlah teungku yét
Adak siringgét, fahla han jiwèh
Ka nibak Allah, geubalah palét
Hana geu gampét, siët geubi leubèh

Pubuet ibadah, bèk suwah peulét
Bèk meu-en pét-pét, dalam glé sibrèh
Kajeut takubah, bhah jeut keu bandét
Beh jak teuk talét, bak buet nyang shalèh

Di laot raya, ji suwa karbét
Aneuk khan kawét, jiplueng meutakèh
Ôh noë meumada, haba lam bayét
Mata ka teupét, gensèë ka inggèh

Meunyoë na cupa, haba lôn pirét
Meu'ah teungku bét, meusoë na teupèh
Nyang tuléh rika, nek tuha cirét
Habéh meuwét-wét, lam blang utôh syèh.

Samalanga, 30 April 2020