Peureman Tiktok
Beurijuek sungkôh, meudrôh that ek ok
Cem ujeun picrok, meusom yup rambôt
Meunyoë meuratôh, beureutôh sawok
Sang busoë tembok, makanan supôt
Dalam media, haba ji ok ok
Peureman tiktok, cocok ta seubôt
'Oh trôh u luwa, ka laen cagok
Lagèë jeureubok, ji pok ulèë bôt
Jak mita musôh, rata peulosok
Ta lakèë gitok, ureung dum ta dhôt
Ka meunoë ku sôh, ka meudeh ku khok
Watèë meureumpok, meugok gok tu-ôt
Ta dingoë haba, geunta lam tiktok
Sampe meu yok yok, google karap rhôt
Ban ta pareksa, ka apa patok
Umu ka utok, mantong ceumarôt
Ka jeut neupiyôh, bek le peugot wok
Bek gadôh meuklok, nyang hana patôt
Nyang peugot riyôh, chiët gata tok tok
Habeh dum teupok, ureung di likôt
Bek meuntang teuga, haba teuh ulok
Ek tawiët balok, meu duwa atôt
Tan tabôh harga, di luwa padok
Ta anggap tukok, angen peu bapôt
Meu teu-oh na trôh, nyan jurus catok
Jeut ta dong cikok, cong bak peulincôt
Ingat hai tubôh, lawan nyang cocok
Nyoë ka meureumpok, pantang ji surôt
Tuto ta jaga, haba bek teupok
Bek le peugot wok, ka puteh janggôt
Eumbong bek raya, ta puta cagok
Bek lagèë bagok, hawa keu pulôt
Salah gop ta lhôh, na ube cabok
Droëteuh 'oh ta thok, ka ube laôt
Geutanyoë gadôh, sabe ta meuklok
Jaroë ji prok - prok, ji gop di likôt
Wahe syedara, muda ngon utok
Bek le neu lawok, bhah su-ot sambôt
Ta meu'ah desya, nyang ka ka teupok
Hate nyang luhok, bek tamah irôt
Bek na le kirôh, muprang lam tiktok
Han ek ta pasok, rudal ka lucôt
Saweub goh tudôh, rusia meupok
Ukraina ji phok, ngon rudal ji côt
Meunoë keuh haba, nyang ka lon culok
Menyoë tan harok, mubek teukijôt
Meupat nyang gasa, haba meukochok
Meu'ah that pokok, nyang ulon kawôt