Panton Uroe Raya Idul Fitri 1435 H / 2014

Gunong geurudong, puncak meu uke
Manyang bukon le, gunong seulawah
Meuah desya lon, baten ngon lahe
Awai ngon akhe, kadang na salah

Nyoe uroe raya, katroh meusampe
Dendam lam hate, bek le takubah
Kadang na haba, salah meurawe
Hingga meupake, meu lieh-lieh lidah

Katroh bak masa, han jeut tunda le
Rakan boh hate, meu'ah beubagah
Bek tinggai dosa, 'oh uroe page
Keunong boh rante, azeub bak ALLAH

Walau pih dosa, ubeut bukon le
Bek jeut meusampe, raya that parah
Peugleh anggota, sigohlom mate
Ngat teunang hate, tawoe bak ALLAH

Umpama dosa, lage naleung gle
Nyoe golom mate, laen meutambah
Meunan umpama, ulon boh mise
Beuseureng sabe, beukayem ta rhah

Kuweh haluwa, pasoe lam cupe
Kuweh meusile, pasoe lam caprah
Ka uroe raya, rakan boh hate
Moga bekna le, geutanyoe salah

        Seulamat Uroe Raya
            Idul Fitri 1435 H
Mohon Meuah Lahe Ngon Baten

Panton Uroe Raya Idul Fitri

Manyang meucula, puncak gunong goh
Manyang that jioh, gunong  simpadan
Bak uroe raya, haba lon peutroh
Deungon that sunggoh ,lon kirem peusan

Meuah lon pinta, man saboh tuboh
Mangat bek sungkoh, deurita badan
Kadang na haba, salah meuratoh
Kadang chiet na roh, dawa-dawaan

Ubena dosa, yang ka meusaoh
Meuah rakan bèh, ulon harapkan
Agam ngon dara, seumoga beutroh
Meuah yang sunggoh, nibak lebaran

Rot layeu kaca, haba lon peutroh
Saweub that jioh, di ulon tuan
Takot meutuka, lon kirem bungkoh
Takot hana troh, lon kirem peusan

Seulamat raya, wahe rakan böh
Moga beujioh, lam kesalahan
Meunyoe na desya, di dalam tuboh
Jaroe neupeutroh, saleng maafkan

Di ateuh meja, na eungkot muloh
Di dalam bungkoh, na eungkot tamban
'Oh noe keuh haba, yang ulon peutroh
Moga bagah troh, bak rakan-rakan.

             Seulamat Uroe Raya 
             Idul Fitri 1435 H
Mohon Meu'ah Lahe Ngon Baten



Jigrop meu puseng, eungkot jeunara
Jigrop meuputa, eungkot bubaji
Lahe ngon baten, meu'ah lon pinta
Bak uroe raya, hate beu suci

Peusan lon kirem, rot layeu kaca
Seubagoe tanda, silaturrahmi
Walau han mungken, meutatap mata
Dua krak haba, teutap ulon bi

Kadang meu tunggeng, salah meu haba
Kadang meudawa, salah tanggapi
Ngon hate licen, hana meu noda
Meuah lon pinta, di dalam hati

Kuweh keu ripeng, di ateuh meja
Kuweh mentega, ateuh kurusi
Lahe ngon baten, ta meu'ah desya
Ngat bek binasa, ngon po ya rabbi

HIKAYAT ACEH SULTAN ISKANDAR MUDA ( RAJA ACHEH ) DEUNGON RAJA JOHOR, RAJA MALAKA, RAJA ASAHAN, DAN PUTROE PAHANG

                     Pengarang: Cek Wandy

SULTAN ISKANDAR MUDA


Salam 'alaikum, kaum keurabah
Saleum si ulah, lon bagi rata
Ulon meu jangeun, di dalam kisah
Meuheut si leumpah, meutuleh rika

Siseun dua seun, kata lon olah
Walau pih susah, teutap lon coba
Sapue bek neukheun, rakan meutuwah
Walau hana pah, meu ato kata

Saboh hikayat, akan lon kisah
Masa seujarah, iskandar muda
Ata jameun that, meuhat lon papah
Bek gadoh marwah, pembela bangsa

Mula phon that-that, haba lon peugah
Raja yang meugah, dua saudara
Di johor teumpat, mula phon kisah
Raja yang gagah, awak nyan dua

Phon RAJA RADEN, nama yang meugah
Pemuda gagah, cukop seutia
RAJA SI UJUT, pih saban gagah
Ureung sep juwah, keujam that raya

Nibak si uroe, raja meutuwah
Ka lheuh di peupah, saboh rencana
Raja dua droe, yang jithe meugah
Ngon aneuk buah, beuhô leumpah na

Negeri pahang, di keuneuk jajah
Putroe yang ceudah, sasaran raja
Meunyoe bit pahang, teubukti kalah
Si putroe ceudah, keu raden sigra

Meunan keuh janji, si ujut peugah
Jadeh meunikah, awak nyan dua
Prang pih terjadi, keubit that parah
Rot laot luwah, di bagi teuntra

Ladom rot darat, pasukan gagah
Di kupong luwah, deungon seunjata
Prang pih sep dahsyat, gawat sileumpah
Pahang ka kalah, hana le daya

Di putroe pahang, di culek bagah
Laju di seurah, pada sang raja
Lheuh nyan ji riwang, deungon meuriah
U johor arah, bak asai mula

'Oh troh u johor, raja yang gagah
Janji meu ubah, sidroe sang raja
Raja si ujut, haba ji bantah
Putroe phang ceudah, hanjeut meucuca

Keu raja raden, hanjeut ta seurah
Cocok sileumpah, kamoe nyoe dua
Harus ngon ujut, putroe meunikah
Meunan di peugah, akhe calitra

Dawa bin dawa, raja meutuwah
Hana meungalah, meusidroe raja
Sampoe jak mita, putusan yang pah
Supaya jeulah, bek jeut keudawa

Langsong u acheh, ji beu'ôt langkah
Raja yang gagah, dua saudara
Karna di acheh, raja that meugah
Ade si leumpah, akhlak mulia

Laju beurangkat, rot laot luwah
Ngon aneuk buah, ikot seureuta
Di putroe pahang, hana di kubah
Jiba ngon gagah, ikot ngon raja

Menuju acheh, seuramoe mekkah
Langsong di singgah, u pulo ruja
'Oh troh u acheh, raja meutuwah
Geu sambot bagah, le sultan raja

Di raja acheh, seunang si leumpah
Katroh meu langkah, dua droe raja
Deungon tujuan, jak proh masalah
Kiban keuh yang pah, meunurot raja

Abeh calitra, mandum masalah
Putusan yang pah, lhee uroe masa
Na sidroe mentri, haba geu peugah
Ngon raja gagah, dua saudara

Saboh tawaran, keu raja gagah
Langsong geu peugah, tanpa na paksa
Agama islam, tamong lah bagah
Cocok si leumpah, man dua raja

Raja si ujut, laju ji bantah
Yang mentri peugah, hana ji suka
Seudangkan raden, langsong ji peugah
Seumike yang pah, peureulee masa

Lhee uroe lheuh nyan, sultan peu jeulah
Putusan yang pah, keu dua raja
Nyan putroe pahang, keu raden jatah
Cocok si leumpah, awak nyan dua

Dudoe awak nyan, hate meu ubah
Ji tamong bagah, islam mandua
Teuma si ujut, ka ji-ek darah
Ji teuka marah, luar biasa

Han ji teurimong, yang sultan peugah
Bit keubit icah, keu sultan raja
Keudeuh u johor, ji riwang bagah
Ngon mata mirah, that masam muka

Sabe si ujut, mita masalah
Beungeh si leumpah, keu sultan raja
Akhe buet raden, putroe geu seurah
Keuraja gagah, iskandar muda

'Oh lheuh nyan teuma, laju meunikah
Putroe yang ceudah, ka deungon raja
Raden pih sama, langsong meunikah
Cukop meuriah, hate gembira

Ngon adek sultan, raden meunikah
Lagak si leumpah, putri ti jeumpa
Raja si ujut, meutamah marah
Deundam meutambah, keu sultan raja

Ujut beurangkat, hate that marah
Ngon kapai gagah, armada raya
U acheh teumpat, ji takat arah
Si ujut singgah, di pulo ruja

Di raja acheh, sambot le bagah
Si ujut langkah, deungon armada
Deundam si ujut, han jeut di kubah
Rata daerah, karu di mita

Ureung di rampok, rakyat tan salah
Rata wilayah, peugot peukara
Soe yang di reumpok, barang ji rupah
Keujam si leumpah, lage nyan cara

Di raja acheh, teuka geulisah
Ngon hate tabah, teutap meusaba
Bak raja raden, sultan geu peugah
Raden meutuwah, geuyue jak gisa

Balek u johor, laju le bagah
Mangat masalah, bek jeut keuraya
Di raja raden, langsong meu bantah
Han ji bôt langkah, untuk jak gisa

Karna di acheh, ureung tan juwah
Galak that leumpah, tinggai ngon raja
Lom pih di sinoe, raden meunikah
Seunang si leumpah, hate gembira

Raja si ujut, meutamah marah
Ka ji-ek darah, meutamah teuga
Nyan gampong london, jitôt le bagah
Ngon apui mirah, hu ube raya

Rakyat di rampok, barang di rupah
Hana di kubah, mandum di raba
Lheuh nyan si ujut, ji riwang bagah
Golom sit puwah, di dalam dada

'Oh troh u johor, laen ji olah
Siap peukakah, alat seunjata
Siap alat prang, ngon aneuk buah
Ji keu neuk jajah, aceh mulia

Eungkot tangiroe, lam riyeuk bicah
Eungkot khan gapah, di mieng kuala
Pakhok lon gantoe, buhue lon ubah
Supaya jeulah, ujong calitra

'Oh ban geu tupue, ka uleh sultan
Muka ka masam, beungeh pih teuka
Langsong meupakat, raden ngon sultan
Untuk menghadang, raja bahaya

Mandum di rakyat, peusapat rijang
Peugot alat prang, ngon kapai raya
Kaye raya that, kadeuh teupampang
Ci olah rijang, peugot armada

Lapan beuleun ka, masa berjalan
Seulusoe rijang, peugot armada
Kon saboh dua, kapai di sultan
Siribe macam, geu ilah daya

Kapai nyan teuma, untuk jak meuprang
Deungon pasukan, si ujut raja
Nyan CAKRA DONYA, nama gelaran
Yang geu namakan, ka oleh raja

Mandum daerah, jak kirem peusan
Surat geu layang, le sultan raja
Siap beu bagah, mandum pasukan
Untuk jak meuprang, katroh bak masa

Teuma di suót, le putroe pahang
Keupada sultan, iskandar muda
Yoh goh neu lanjot, nibak tujuan
Keu panglima prang, neu pileh sigra

Lheuh nyan teuma lom, di putroe pahang
Haba di peusan, bak sultan raja
Meunyoe neu lewat, nanggroe asahan
Bek su meuriyam, sinan bahaya

'Oh kalheuh putroe, jibi ngon saran
Beurangkat sultan, ngon mandum teuntra
Rot jalur darat, beurangkat sultan
Geu èk kapai prang, nibak kuala

Di jambu aye, geu-ek di sultan
Deungon pasukan, siap seunjata
Langsong u pidie, bak phon sasaran
Geu piyoh rijang, di sultan raja

Panglima pidie, deungan pasukan
Menghadap sultan, lam seketika
Panglima pidie, siap kapai prang
Meu gabong rijang, ngon kapai cakra

Langsong beurangkat, laju lom sultan
Deungon pasukan, ube-be yang na
Troh u meureudu, geu piyoh rijang
Menghadap sultan, japakeh nama

Nibak japakeh, geu ceuritakan
Bahwa di sultan, kana rencana
Ngon nanggroe johor, rencana meuprang
Kiban pakiban, jinoe hai teuma

Suót japakeh, bereh that sultan
Di ulon tuan, seutuju teuma
Siap di ulon, deungon pasukan
Meu gabong rijang, ngon cakra donya

Langsong beurangkat, laju lom sultan
Jak cok pasukan, di samalanga
Mandum meu sapat, rakyat ikotan
Meu gabong saban, rakyat ubena

Sambong laju lom, lam perjalanan
'Oh troh peusangan, piyoh lom sigra
Lheuh musyawarah, sultan di sinan
Teuntra peusangan, ikot seureuta

Ka dua uroe, sultan di sinan
'Oh lheuh nyan teuman, beurangkat raja
U jambu aye, gabong rombongan
Saweub di sinan, ka siap teuntra

Yoh goh beurangkat, mandum pasukan
Taktik dalam prang, atô reuncana
Geu peuduk rapat, ka uleh sultan
Masalah meuprang, yang terutama

Panglima pidie, geubi ngon saran
Keupada sultan, iskandar muda
Cocok si leumpah, keu panglima prang
Nyan MALEM DAGANG, hai sultan raja

Dari meureudu, gopnyan troh datang
Taktik dalam prang, lam ulee kana
Langsong seutuju, laju le sultan
Nyô MALEM DAGANG, jeut keu panglima

PANGLIMA PIDIE, raja tentukan
Ngon RADEN saban, cocok leumpahna
Jeut keu peu dampeng, nyan malem dagang
Bantu dalam prang, atô reuncana

Teuma JAPAKEH, peunasehat prang
Cocok that rumbang, jeut keu ulama
Kabeh sang bereh, lam peulantikan
Japakeh rijang, yang baca do'a

Do'a seulamat, yang geu bacakan
Mudah-mudahan, bekna sapeu na
Teuka seumangat,  mandum pasukan
Meu sapat rijang, lam CAKRA DONYA

Di sultan raja, ngon putroe pahang
Geu-ek ngon rijang, lam cakra donya
Langsong beurangkat, mandum pasukan
Arah tujuan, u timu teuma

'Oh troh armada, teumpat asahan
Teu ingat sultan, sinoe bahaya
Teu ingat haba, dari putroe phang
Bek su meuriyam, deungon seunjata

Teuma di raja, neuk eu buktian
Haba putroe phang, meuneuk peu nyata
Langsong di teuntra, peulheuh meuriyam
Amanah SULTAN, ISKANDAR MUDA

Ji musu riyoh, bunyi letupan
Deungon balasan, cukop that raya
Teuma geu piyoh, siat di sultan
Kapai geu lansam, deungon igoe sa

Langsong di maju, teuntra asahan
Menghadap rijang, nibak armada
Di tanyong laju, maksud troh datang
Puetra tujuan, keunoe neu teuka

Sigra geu jaweub, le malem dagang
Kamoe meuneuk prang, raja bahaya
Ngon raja johor, kamoe neuk lawan
Nyan keuh tujuan, rôt noe troh teuka

Di jaweub laju, teuntra asahan
Kamoe neuk lawan, uji teunaga
Ngon teuntra acheh, neuk tes kuatan
Siap kamoe prang, ubena teuntra

Sigra meu pakat, laju le sultan
Ngon malem dagang, sidroe panglima
'Oh lheuh meu pakat, siap untuk prang
RAJA ASAHAN, meu lawan teuma

Langsong mulai, dari asahan
Di tembak rijang, habeh pue yang na
Seurangan jibi, meu macam-macam
Sampoe karap lham, nyan CAKRA DONYA

Rombongan ACHEH, deungon pasukan
Balah tembakan, deungon seunjata
Prang yang that dahsyat, ACHEH-ASAHAN
Ngon pertempuran, luar biasa

Langsong JAPAKEH, geubi ngon saran
Keu MALEM DAGANG, ngon cara-cara
Pasukan ACHEH, meu darat rijang
Ngon panglima prang, laju le sigra

Bak bineh pante, sare jimuprang
Dahsyat hana ban, luar biasa
Surot laju le, teuntra asahan
Benteng bertahan, laju ji mita

Ka siploh uroe, lam pertempuran
Taloe asahan, ji plueng meutaga
Pimpinan lhee droe, panglima meuprang
Jak reubot rijang, istana raja

Nyan permaisuri, teuma di tahan
Ji peu ek sajan, dalam armada
Ngat ji meunyerah, raja asahan
Putroe tersayang, hana meuhoka

'Oh teuntra acheh, dalam kapai prang
Raja asahan, barô ji gisa
'Oh ban ji teupue, ratu di tahan
Seudeh hana ban, hate di raja

Na sidroe mentri, jibi ngon saran
Raja asahan, meunyerah sigra
Jak lake ampon, nyan keusalahan
Ateuh tindakan, ubena yang ka

Bak raja acheh, menghadap rijang
Buah-buahan, bek tuwoe neuba
Langsong beurangkat, raja asahan
Ngon mentri sajan, menghadap raja

U ateuh kapai, meunuju rijang
Menghadap sultan, meu'ah di pinta
Meunyerah kalah, raja asahan
Han le meu ulang, lage yang ka ka

Di raja acheh, teurasa sayang
Ratu geu pulang, keupada raja
Langsong di jaweub, keupada sultan
Teuntra asahan, neuk meu saudara

Siap di kamoe, teuntra asahan
Meu tamong islam, man mandum teuntra
Teuma hai jinoe, lanjut lom sultan
U johor rijang, deungon armada

Panglima pidie, pimpinan meuprang
Meu sapat rijang, ngon raden sigra
Teuma japakeh, ngon malem dagang
Nyan di asahan, duek seumentara

Na padum uroe, kapai berjalan
Ka troh lah sultan, u johor tiba
Kuala johor, geu piyoh sultan
Peulheuh meuriyam, arah udara

Akan teutapi, sunyi hana ban
Hana balasan, keutanda-tanda
Raja si ujut, nibak masa nyan
Di kaluet teuman, di dalam guha

Karna si ujut, deungon tujuan
Ji neuk jak seurang, acheh mulia
'Oh ban ji tupue, acheh troh datang
Beungeh hana ban, si ujut raja

Dari lam guha, bagah ji riwang
Di keupong rijang, ubena teuntra
Laot ngon darat, kana pasukan
Siap meunyerang, ngon sultan raja

Teuma 'oh lheuh nyan, di malem dagang
Deungon pasukan, beurangkat sigra
Langsong beurangkat, dari asahan
Deungon kapai prang, mandum armada

Di laot banang, meu reumpok rijang
Deungon pasukan, si ujut raja
Teuma di sinan, awak nyan meuprang
Ngon pertempuran, luar biasa

Langsong ji bithee, keupada sultan
Bahwa kana prang, di laot raya
Di laot banang, teungoh di seurang
Dahsyat hana ban, seurangan teuka

Beurangkat teuma, laju di sultan
Deungon pasukan, ubena teuntra
Meutamah seru, lam pertempuran
Mandum ji meuprang, deungon seunjata

Teuma di Acheh, karap taloe prang
Hana le imbang, pasukan teuntra
Laju japakeh, meu lake rijang
Bak sidroe TUHAN, do'a geu pinta

'Oh lheuh meu do'a, ka nibak TUHAN
Seumangat rijang, geubi keuraja
Man lhee panglima, seumangat datang
Hingga dalam prang, imbang lom teuka

Kana si beuleun, lam pertempuran
Taloe ngon meunang, golom na tanda
Panglima pidie, nibak si malam
Lumpoe troh datang, tijoh ie mata

Sang-sang lam lumpoe, nibak malam nyan
Ulon berenang, lam laot raya
Lheuh nyan sang hanyôt, dalam geulumbang
Laju tenggelam, hana muhoka

Nibak japakeh, geu peugah rijang
Seudeh hana ban, geu deungoe haba
Karna japakeh, cuba artikan
Karap troh datang, ajal ji teuka

'Oh wate singoh, teungoh dalam prang
Di kapai lawan, ji rapat sigra
Panglima pidie, keunong tembakan
Nyawong meu layang, lam seketika

Manyèt panglima, ji puwoe rijang
Keudeh asahan, lam seumentara
Lheuh nyan ji gisa, laju pasukan
Ikot dalam prang, lage biasa

Panglima pidie, di gantoe rijang
Le JAPU INTAN, pahlawan jawa
Yang katrep that-that, na sajan sultan
Jak bantu meuprang, ngon sultan raja

Seumangat acheh, meutamah garang
Ngon kekuatan, meutamah teuga
Deungon that gigeh, acheh meunyerang
Dahsyat hana ban, seurangan teuka

Akhe buet johor, taloe dalam prang
Mandum pasukan, ji plueng meutaga
Teuma si ujut, teutap meu lawan
Mantong meunyerang, meu macam cara

Armada acheh, meu rapat rijang
Deungon kapai prang, si ujut raja
Langsong geu takeh, di malem dagang
Dalam kapai prang, si ujut sigra

Di raja raden, pih na ikotan
Di japu intan, ikot seureuta
Si raja ujut, menghadap rijang
Ngon malem dagang, adu teunaga

Di raja ujut, ngon malem dagang
Keubai ngon badan, ureung nyan dua
Langsong meutarong, adu kuatan
Man dua saban, sama that teuga

Kana lhee uroe, wate berjalan
Leumoh di badan, si ujut raja
Raja si ujut, rubah meu timphan
Buet malem dagang, laju le sigra

Laju ji rante, si ujut rijang
Keudeh bak sultan, laju le diba
Raja si ujut, ka keunong tahan
Hana le lawan, hana meu daya

RAJA MALAKA, ka laen macam
Di neuk bebaskan, si ujut raja
Ka di peusiap, mandum alat prang
Untuk menghadang, adu seunjata

'Oh ban troh lewat, armada sultan
Di tembak rijang, deungon seunjata
Langsong meu darat, laju pasukan
Ngon japu intan, siap siaga

Awai ji tupue, troh japu intan
Di ragap rijang, uleh malaka
Akhe jieh teuma, di japu intan
Keunong tembakan, ajal troh teuka

Manyét di puplung, uleh pasukan
Langsong ji riwang, nibak armada
Di raja raden, ngon malem dagang
Siap pasukan, meu darat sigra

Meunuju langsong, ikot dalam prang
Ngon pertempuran, lawan malaka
Mandum di keupong, buet malem dagang
Deungon pasukan, gagah perkasa

Teuntra malaka, takot hana ban
Ji plueng ngon rijang, hana meuhoka
Acheh kuasa, benteng bertahan
Meupreh ji riwang, raja malaka

Lhee beuleun meupreh, sinan pasukan
Hana ji riwang, meu sidroe teuntra
Pasukan acheh, beurangkat rijang
Deungon pasukan, mandum armada

Armada acheh, beuserta sultan
Nanggroe asahan, siat geu gisa
Panglima pidie, yang gugur lam prang
Sinan kuburan, lam seumentara

Geu puwoe langsong, ka uleh sultan
U pidie rijang, geu piyoh teuma
Panglima pidie, yang gugur meuprang
Sinan kuburan, seulama-lama

Mandum piyoh hek, sinan pasukan
Leumoh that badan, deungon teunaga
Han ek meukeutek, teutiek meutimphan
Saket hana ban, mandum anggota

Beurangkat sigra, laju lom sultan
Meunuju rijang, u pulo ruja
Nibak kuala, ka dipreh sultan
Meuriah han ban, ji sambot raja

Langsong lah laju, di putroe pahang
Meu pakat sultan, masok istana
Raja si ujut, laju di tahan
Lam keuadaan, meu rante teuma

Si beuleun lanjut, wate berjalan
Troh malem dagang, meu reumpok raja
Di raja ujut, meurante badan
Ka nibak sultan, peuhadap sigra

Teuma japakeh, geubi ngon saran
Meunyerah rijang, hai ujut raja
Raja si ujut, teutap bertahan
Walau di badan, meurante baja

Akhe buet raja, yang bi putusan
Si ujut rijang, ta hukom sigra
Hukuman mate, raja jatuhkan
Keu raja keujam, yang meubahaya

Di malem dagang, meu laksanakan
Peurintah sultan, iskandar muda
Tapi si ujut, keubai di badan
Meuluka pih tan, deungon seunjata

Walau hana lhut, deungon pukulan
Ka leumoh badan, si ujut raja
Akhe si ujut, di peugah saran
Bak malem dagang, ngon saboh cara

Kayee geureutoe, neumita rijang
Baro di badan, ulon nyoe luka
Langsong geumita, le malem dagang
Ngon sigoe hantam, nyawoeng binasa

Baro lah acheh, teunang pikiran
Rata kawasan, rakyat bahgia
Nanggroe ka bereh, makmu hana ban
Bawah pimpinan, iskandar muda

Yang ka geu bantu, le malem dagang
Deungon pasukan, gagah perkasa
Akhe jieh acheh, jadeh berkembang
Hana gangguan, mara bahaya

'Oh noe keuh kisah, dile lon karang
Ta sambong rijang, di laen rika
Meunyoe na salah, dalam keunarang
Ngon hate lapang, meu'ah lon pinta.






    SULTAN ISKANDAR MUDA
-Lahè             ; B.Aceh, seulasa 1593
-Meuninggai ; 27 DESEMBER 1636
-Nan ayah     ; Raja Mansyur Syah
-Nan ibu        ; Indra Wangsa
-Agama          ; Islam

Hikayat Sultan Iskandar Muda ( RAJA ACHEH ) Deungon Raja Rom Mekkah

                 
                  Pengarang : Cek Wandy

Salam 'alaikom, lon peu phon kalam
Ngon izin TUHAN, katroh lon teuka
Ulon bi saleum, keu mandum rakan
Inong ngon agam, tuha ngon muda

Laot jeureulah, bicah geulumbang
Riyeuk meuhantam, beurawang teuka
Ulon neuk kisah, saboh keunarang
Hikayat sultan, iskandar muda

Deungoe lon peugah, kisah mulaan
Seujarah sultan, iskandar muda
Jithee that meugah, yoh masa silam
Mandum di seugan, acheh mulia

Nibak siuroe, teuma di sultan
Geukirem peusan, keudeh u luwa
Untuk raja rom, pakat meurakan
Persahabatan, raja ngon raja

Bak aneuk buah, geuyue sampaikan
Beutroh tujuan, kabar beurita
Keudeh u mekkah, laju sasaran
Rot laot jalan, jak kirem haba

Di aneuk buah, jak ba utusan
Amanah sultan, iskandar muda
Ngon kapai gagah, ata buatan
Lhee boh berjalan, dalam samudra

Na bacut salah, lam perjalanan
Sisat kapai nyan, lam laot raya
Ka teuka deuk grah, mandum disinan
Mandum makanan, hana yang sisa

Yang na deuh leumah, kiriman barang
Hadiah sultan, khusus keu raja
Di nanggroe mekkah, goh deuh tujuan
Ubena barang, kabeh lam raga

Di aneuk buah, ka leumoh badan
Rubah meutimphan, hana teunaga
Sigohlom parah, hantroh tujuan
Barang lam peusan, suah peugala

Geu publoe murah, ubena barang
Untok bertahan, lam laot raya
Adak pih salah, ka deungon sultan
Yang peunteng peusan, beutroh ban pinta

Masa lhee thon pah, baro troh datang
Nanggroe tujuan, ka deuh dimata
Katroh u mekkah, pasukan sultan
Meureumpok rijang, ka deungon raja

Male sileumpah, mandum pasukan
Barang titipan, hantroh keu raja
Tamah geulisah, susah hana ban
Kiban pakiban, 'oh troh bak raja

Meu hayon langkah, gagah pasukan
Menghadap rijang, deungon sang raja
Dalam keureutah, na saboh peusan
Di dalam reugam, sipucok lada

Nibak raja rom, geujok hantaran
Ngon saboh peusan, sipucok lada
Hana meusom-som, yang keujadian
Geu peungah rijang, mandum ceurita

'Oh lheuh raja rom, geubaca peusan
Seunang hana ban, di dalam dada
Sira bak geudong, leumah pikiran
Ingat keu sultan, yang that mulia

Seunang sileumpah, meutamah garang
Saweub di sultan, geukirem haba
Acheh yang meugah, yang gagah sultan
Tanpa dugaan, keunoe troh teuka

Ngon seunang hate, gembira han ban
Geujok balasan, luar biasa
Keu raja acheh, geujok alat prang
Sipucok meryam, hadiah raja

Meugah meuhayak, sipucok meryam
Jithe le awam, sampoe u luwa
Hingga sicupak, nama gelaran
Hayeu hana ban, hana bandeng sa

'Oh lheuh geu seurah, sipucok meryam
Geujok pasukan, ahli seunjata
Nyan keuh dua blah, jumlah pasukan
Kirem keu sultan, iskandar muda

Di aneuk buah, pasukan sultan
Mandum jiriwang, U acheh sigra
Menghadap bagah, laju bak sultan
Troh bak tujuan, lhee beuleun masa

Bantroh hadiah, ka nibak sultan
Seunang hana ban, di dalam dada
Raja rom mekkah, seurah pasukan
Bala bantuan, peugot seunjata

Deungon dua blah, jumlah pahlawan
Geu peugot rijang, istana raja
Lheuh nyan diolah, benteng bertahan
Sampoe gunongan, siap seudia

Di sampeng teuma, ji peugot rijang
Bale temuan, keu sultan raja
Seulanyan hameh, rapat temuan
Mandum pasukan, ka deungan raja

Hana trep laju, 'oh lheuh nibak nyan
Geu peugot teuman, nyan MESJID RAYA
Lam masa sithon, rakyat wate nyan
Bawah pimpinan, pahlawan luwa

Raja rom kirem, nibak masa nyan
Ka mudah teuman, di sultan raja
Hingga teujalen, saboh hubungan
ACHEH MEKKAH nyan, ka jeut saudara

'Oh katroh sithon, ikot awak nyan
Ka siap teuman, istana raja
Kasiap benteng, keu pertahanan
Siap geunongan, bahan seunjata

Teuma raja rom, geukirem peusan
Keupada sultan, surat rahsia
Asoe lam surat, gawat hana ban
Geuyue leunyapkan, ahli seunjata

Man dua blah droe, geuyue poh sinan
Karna awak nyan, cukop bahaya
Jeuheut that tuloe, akai awak nyan
Hanjeut takheun han, katroh bak masa

Han itheun hate, laju le sultan
Rasa that sayang, di dalam dada
Hana geupike, soal leunyapkan
Saweub di sultan, rasa that iba

Hana trep tempo, 'oh lheuh troh pesan
Bukti teu pampang, dikeu-keu mata
Jipeugot kacho, mandum pasukan
Uroe ngon malam, hana pre reuda

Keu rakyat acheh, han le di seugan
Mentri ngon sultan, hana dikira
Dijak u pasai, dicok dum barang
Di bayeu pih tan, nyan ban cerita

Rupajih butoi, surat troh datang
Baro lah sultan, seumike cara
Geumita cangkoi, seureuta ngon lham
Geukurek lubang, cukop that raya

Teungoh geukueh-kueh, geukurek lubang
Awak nyan rijang, di seurang massa
Jirhom ngon bate, mandum pasukan
Nyawong meulayang, ajal jiteuka

Baroe lah makmu, rakyat oh lheuh nyan
Saweub awak nyan, kabeh binasa
Ban peut penjuru, teurasa aman
Rakyat dum seunang, deungon gembira

'Oh noe keuh kisah, dile lon karang
Seujarah sultan, yoh jameun masa
Ngon raja mekkah, ban adoe abang
Jalen hubungan, tanda saudara

Meunyoe na salah, asoe keunarang
Meu'ah hai rakan, yang ulon pinta
Kadang seujarah, salah lon reupang
koreksi rijang, neukirem haba

Panton Aceh / Nasib Lam Rantoe

Salam 'alaikum, rakan sinaroe
Jioh deungon toe, saleum lon intat
Ulon meujangeun, meutuleh rampoe
Kisah lam rantoe, dalam hikayat

Eungkot khan pisang, dalam ie cikoe
Eungkot tangiroe, jigrop-grop loncat
Seudeh kon wayang, nasib lam rantoe
Malam ngon uroe, rasa weuh that-that

Mita raseuki, meumacam bagoe
Rata jeut sagoe, meumita teumpat
Dari pöt campli, sampe boh panjoe
Timang meukiloe, untuk tamukat

Mukat indomi, ngon bakong asoe
Mukat boh kiroe, leungkap ngon alat,
Mukat boh punti, ngon eungkot sumboe
Malam ngon uroe, sabe tamukat

Thon ka nibak thon, 'oh tapeusahoe
Yang na chiet rugoe, 'oh tapeutupat
Wate tapeutron, hasil ruôh droe
Rata jeut sagoe, utang meuikat

Seudeh hana ban, nasib lam rantoe
Han troh ulon woe, u gampong teumpat
Janji saboh jan, deungon poma droe
Akan ulon woe, u gampong siat

Beuleun ramadhan, meuheut ulon woe
Hana troh sampoe, rasa seudeh that
Raseuki dagang, hana meuasoe
Yang na chit rugoe, meulipat-lipat

Memang lam dagang, ka meunan bagoe
Laba ngon rugoe, meugantoe meuhat
Kadang chit kadang, laba tiep uroe
Kadang chit paloe, rugoe siat-at

Ka nasib badan, lage nyoe sampoe
Kehendak bak poe, han soe ek ilat
Ban beurang kaban, teutap taiem droe
Bak tuhan sidroe, doa ta intat

Mudah-mudahan, beu geubi le poe
Nasib lam rantoe, beu ek ibadat
Dalam meudagang, dilua nanggroe
Beuseureng jaroe, u ateuh leugat.

Panton Aceh / Teuka Teuki

Saboh binatang jitrôn dari gle
Jipajoh pade meugunca-gunca
Ladom jitueng ladom jihuse
Aci neupike wahe syedara
( jeungki )

Na saboh cicem jipoe u kuta
Sayeup jih duwa gaki jih nam
Jipuseng-puseng ji puta-puta
Ateuh manusia jitoh ek sinan..?
( lat-lat )

Tajak u laôt takawe rambeu
Takareu-kareu sikawe mata
Meublèt-blèt kilat kham khum geulanteu
Kabeh meusiseu dalam blang raya..??
( Cangguek 'Oh Musem Ujeun )

Mak jih ceumeucop aneuk jih dikliek
Yah jih meutungkiek laloe piep rukok
Wate di hôi gop reungguek sang teupriek
Pret prôet teubiet iek geuntot su prek prok..?
( Geulitan Apui )

Hidong panyang badan bulat
Jimat siat-at nibak ule
Singet jimat salah urat,
Iek meucrap-crap jitoh meuade
Meunyoe rakan carong that-that
Peuglah siat beumeu teunte??
( Ciriek )

Cabeung langsat sulu-sulu
Cabeung labu bulat-bulat
Rot barat ureung seumibu
Rot timu ureung seumeurhat..??
( Ureung Teumuleh )

Bak cukop kong cabeung meusambong
Meuribe thon hana di meuboh
Meunyoe bit carong ahli meupanton
Teuka-teuki long aci ju neuploh..??
( Tiang Lestrek )

Simirah pati na tujoh blah boh
umpung limong boh meupageu busoe
aci neubagi beuteugoh-teugoh
lam saboh-saboh padum tapasoe..??
( Jawapan jih Lusa raya lon peugah beh )

Di jak u sabang ngon kapai seulam
jaroe di gawang rasa hana hek
Pue keuh binatang darah jih hitam
Tuleung bak badan cuma sikrek..??
( Noh )

Sayeup raya warna hitam
Uroe malam jaga umpung
Baci teuka wahe rakan
Pue binatang ji èh gantung..??
( Lhông = Kelelawar )

Mata jih rabon 'oh wate uroe
Peungeuh tuloe 'oh wate malam
Meunyoe carong gata hai adoe
Peuglah sigoe puetra binatang..??
( Jampok )

Takue payang meunan lage
Pucok kaye jeut keu eumpeun
Pue binatang wahe gure
Bukon cage bukon limpeun..???

Pue binatang badan jih langsing
Wate ji meungieng iku meujungkat
Keu-ieng pinggang bit keubit ramping
saket meu ing-ing meunyoe bit jikap..??
( Seureungga )

Saket badan kureung gairah
Meuphõh rubah hana daya
Pue binatang tukang piep darah
Sampe parah jeut malaria...??
( Jamok )

Tajak u peukan tamita kuweh
Taeu beu gleh-gleh bek salah raba
Kulet jih hitam asoe jih puteh
Mameh peureuseh kalage saka
Meunyoe dirakan carong bit habeh
Jawapan meuceh baci neumita..?
( Boh Kambotta => Buah Manggis )

Aneunk jangkrik garó ule
Weng-weng mise aneuk buya
Meusidetik hana lale
Bileung wate tiep-tiep masa
Meunyoe rakan teuga ule
Yang meuteunte jaweub sigra..??
( Jeum )

Yoh mantong ubeut jeut keu kawan
Jeut keu lawan meunyoe karayôk
Aci neujaweub siat hai rakan
neujok jawapan keunoe beutrôk..??
( Apui )

Raja siuroe bagoe mahkota
Teudeuk di tahta sira termenung
Teumpat dipungui mandum seulingka
Teutahö mata di ureung-ureung
Soe beurangkasoe yang kalheuh baca
jawapan sigra beu meuteumeung..???
( Peulamin )

Pengertian, Ciri dan Jenis Panton

PENGERTIAN PANTON

Panton adalah puisi rakyat yang meu irama. panton asal jih dari kata patonton yang arti jih peuatô-atô. panton pada mula jih troh dalam seujarah meulayu dan hikayat-hikayat yang hayeu pada jameun nyan dan dipeugot dalam bentuk caè-caé(syair). Panton dalam bahasa meulayu dikheun peribahasa yang artijih toe-toe deungon umpama atou seloka yang asal jih dari india.

Panton merupakan salah saboh jeunis puisi jameun yang cukop luwah dituri dalam bahasa- bahasa nusantara. Meunurot Dr. R. Brandstetter kata panton berasal dari akar kata ton, yang teuduek dalam meumacam bahasa Nusantara, misalnya dalam bahasa aceh kata ton nyan arti jih pakhok kata beumeuató, di masa jameun panton nyoe cukop populer di kalangan masyarakat. panton le that digunakan dalam permainan aneuk miet, dalam meucinta, dalam upacara meukawen, dalam lagu dan upacara adat. dan seumum jih dalam tahap kehidupan masyarakat aceh sabe dihiasi oleh panton.

CIRI-CIRI PANTON

Ciri-ciri panton antara jih:
  - Lam saboh alinea yang terdiri dari
    peutboh bareh
  -Tiep-tiep bareh terdiri dari 8 kata
    sampoe 12 kata
  -Bareh phon dan keudua merupakan
    sampiran, seudangkan bareh
    keulhee ngon keupeut merupakan
    asoe atau maksut
  -Sajak (pakhôk) akhe bak ujong bareh
    jih a - b -a - b, hanjeut a - a - b - b.


 JENIS-JENIS PANTON

Jenis-jenis panton teubagi lhee bôh diantara jih:
    1.PANTON ANEUK MIET
    2.PANTON ANEUK MUDA
    3.PANTON UREUNG CHIEK

1.PANTON ANEUK MIET
       panton aneuk miet dibagi lhee boh:
   a.panton sukacita
   b.panton dukacita
   c.panton jeunaka/teuka-teuki (hiem )

1.a.panton sukacita
          panton sukacita adalah panton yang meungungkapkan peurasaan sukacita ureung terseubot. panton nyan geukheun wate lam keuadaan teungoh sukacita, supaya ureung yang deungoe panton nyan ikot chiet meurasakan sukacita.

contoh:

cicem dalam gle, jipoe sep manyang
mita seunangan, u awan miga
supoe keuh hate, yang hana seunang
lomba karangan, meureumpok juara

1.b.panton dukacita
   panton duka cita adalah panton yang mengungkapkan teuntang rasa seudeh sidroe-droe ureung. panton nyoe geukheun le sidroe-droe ureung untuk geupeugadoh rasa dukacita yang teungoh ta alami.

contoh:

si eungkot jiep-jiep, lam riyeuk bicah
ka teuhah babah, geulumbang
tampoe
ji kliek aneuk miet, langet sang beukah
ji preh-preh ayah, hana troh geuwoe

  1.c.panton jeunaka/teuka-teuki ( hiem )
                 panton jeunaka/teuka-teuki ( hiem ) adalah panton yang tujuan jih untuk ta peukhem ureung deungoe. panton nyoe kadang-kadang jipeugot seubagoe saboh cara untuk saleng sindè-menyindé lam keuadaan teungoh takhem-khem, sampe-sampe yang kheun meukheun nyan hana meurasa beungeh atou teupeh hate, deungon panton jeunaka nyoe jeut a harap keuadaan jih seumaken meutamah ceuria.

Contoh:

meu 'iep-'iep cangkriek, lam abeuk meujen
teukeujot cicem, ji wet-wet iku
teungoh ta kliek-kliek, karôh teukhem-khem
kungieng di cicem, teungoh pajoh bu


 2.PANTON ANEUK MUDA
         Panton aneuk muda dibagi peut  
       boh:
       a.panton dagang/panton nasib
       b.panton meuturi (perkenalan)
       c.panton cinta
       d.panton meupisah
          (perceraian)

2.a. panton dagang/panton nasib
        panton dagang/panton nasib adalah susonan kata yang meunyangkot deungon nasib atou keuadaan sidroe-droe ureung. panton nyoe biasa jih dikheun le ureung-ureung yang na lam rantoe wate teuingat u gampong yang katrep hana meugisa atou nasib jih hana saban lage ngon-ngon jih yang laen yang leubeh get daripada nasib jih.

contoh:

riyeuk di pante, meu ukè ujong
bakat meusinthong, alon meutampoe
meuheut lam hate, neuk gisa u gampong
seudeh that untong, hana troh sampoe

ta peugot raket, tajak jeumeurang
dalam geulumbang, peukong keumodoe
ka padup na trep, ulon meudagang
yang na chiet utang, rata jeut sagoe

 2.b.panton meuturi (perkenalan)
          panton meuturi adalah panton yang asoe jih teuntang maksut hate meuheut meuturi sidroe-droe ureung, dan tapeugah jih meulalui panton. panton nyoe menggambarkan niet sidroe-droe ureung untuk meuturi ngon ureung yang baro meureumpok bak phoen. dalam hal nyoe rame that masyarakat yang galak meungon-meungon antara ureung nyoe deungon ureung jeh. apabila na meureumpok sidroe ureung di pat beurangkapat yang meunarek hate, ka pasti akan ta tanyong hal-hal awam untuk tajalen saboh hubungan meungon supaya mangat akrab atou toe deungon ureung nyan.

contoh:

bungong lam taman, meuburek katek
lam uroe tarek, cahya meu ble-ble
meusoe keuh nan, adek yang cantek
ulon teutarek, di dalam hate

ji poe si kumbang, sayeup ji balek ji
tren ngon ji èk, meu rawe-rawe
nan lon hai cut bang, sidara rubek
gampong cot girek, di bineh pante

2.c.panton cinta
          Panton cinta adalah panton yang asoe jih saboh maksut hate yang taneuk peugah keu sidroe ureung yang ta galak.

Contoh:

Ta pula jagong, sideh ateuh gle
Bijeh rap mate, musem khueng teuka
Pijuet badan long, kon hansep doge
Tapi bak pike, ureung lon cinta

Panton nyan dikheun le sidroe ureung keupada pasangan jih atoupun jeut chiet takheun panton nyoe seubagoe saboh cara untuk meurayu ureung yang meulawan jeunis (pasangannya). Panton cinta nyoe menggambarkan rasa cinta sidroe ureung keu ureung yang laen dan geupeugot kata-kata yang leubeh-leubeh lage pijuet badan bak pike ureung ta cinta. Yang takheun nyan teunte jih sang keukaseh tanyoe sampe meurasa teusentoh hate dan seumaken meutamah lom galak keupasangan jih.

2.d.panton meupisah (perceraian)
           Panton meupisah adalah panton yang asoe jih teuntang kata-kata meupisah atau meucre. Panton nyoe dikheun 'oeh wate keudua pasangan yang teungoh na masalah dan mungken na niet untuk meupisah ataupun meuputoh hubungan jih.

Contoh:

Cikok goe kawe, jikap khan siblah
Paken ek salah, si mirah mata
Beôk meupake, dalam masalah
Ek jeut meupisah, geutanyoe dua

Panton meupisah nyoe menggambarkan rasa gundah sidroe ureunh yang ditinggai le pasangan jih.


3.PANTON UREUNG CHIEK
       Panton ureung chiek dibagi na lhee boh;
       a.panton nasehat
       b.panton adat
       c.panton agama

3.a.panton nasehat
           Panton nasehat adalah panton yang maksud kata-kata jih meumakna peu ingat atawa meungarahkan seureuta tateugur sidroe-droe ureung beujeut yang leubeh gôt. Panton nasehat nyoe dari jameun keu jameun kana perkembangan, bak awai mula jih panton hanya keuh karya lisan yang spontan yang dikheun le ureung-ureung carong.

Contoh:

Jigrop aneuk hiet, ule jih uyup
Jidop aneuk deut, jikliek meu 'a-'a
Yoh masa ubiet, beutatem jak beut
'Oeh rayék ngat jeut, ureung meuguna

3.b.panton adat

Panton adat adalah panton yang geupakek gaya bahasa jih meupicu teuntang daerah dan unsur adat budaya. Panton adat nyoe teuseubar na dimaseng-maseng daerah. Tiep-tiep daerah mesti na panton adat yang meubeda-beda.

Contoh:

Tapula coklat, tapula gandom
Timoh meususon, hana salah cok
Mula phoen adat, ka nibak hukom
Bek salah muphom, meu lawok-lawok

Adat meukoh reubong
Hukom meukoh purieh
Adat jeut meurangkahoe takong
Hukom hanjeut beurangkahoe takieh

3.c.panton agama
         Panton agama adalah panton yang idalam jih meungandong teuntang kata-kata nasehat yang meumakna lage saboh peudoman dalam tajalani udep, yang biasa jih kata-kata nyan diyue geutanyoe untuk tapubuet yang hana meulanggeh deungon atoran agama, pue keuh yang meunyangkot droe-keudroe atawa yang meunyangkot ureung laen.

Contoh;

Takoh bak buloh, pula bak pisang
Tapeugot timphan, 'oeh muboh teuka
Tapubuet suroh, peujioh larang
Ingat keu TUHAN, bek sampe lupa

Panton Aceh / Teuka Teuki / Hiem

Tuboh pih na jaroe pih na
Cukop meuguna 'oh wate ujeun
Ulèè ngon gaki nyan yang hana
Puetra teuma meunyoe takheun..?

Jaweub : ( Jas Ujeun ) 

Tajak bloe cawan sideh cot girek
Tajak rot cebrek tawoe rot geudong
Meunyoe bit rakan carong ngon lisek
Puetra yang jiek hantom jitrôn-trôn..?

Jaweub : ( Umu )

Sira dijak di seumajoh,
Ek jitoh deungon rhueng,
Meunyoe rakan hayeu bit sunggoh,
Aci neuratoh jawapan neukheun..??

Jaweub : ( Nyeh )

Di meueu-en pet-pet si mirah pati,
Dimeu-en kasti beurijuek balu,
Yang lèt hana gaki,
Yang lari hana iku..??

Jaweub : ( Uleu Let Cangguek )

Cupet bak ule hana dimusu,
Cupet bak iku hu aneuk mata
Meuyoe rakan bit-bit hayeu
Neukheun laju jaweub sigra..???

Jaweub : ( Sente )

Jikeumubang aneuk sipot,
Kipah pot-pot aneuk den-den,
Meuribe macam eungkot di laot,
Puetra nan eungkot yang sabe dikhem..??

Jaweub : ( Ciriek Khak )

Boh manok kom mubei reuhang,
Mubei santan manok gampong,
Meunyoe carong gata rakan,
Pue binatang lungke bak hidong..??

Jaweub : ( Badeuk )

Cage itam rimueng tafa,
Cicem pala beuho tungang,
Pue binatang aci teuka,
Pinyueng raya idom panyang..??

Jaweub : ( Gajah )

Meusumpom lumoe nibak ateung blang,
Keubeu kumubang ka teukhem sidroe,
Curak lage nyoe puetra binatang,
Man saboh badan meuduroe-duroe..?

Jaweub : ( Landak )

Meunyoe takalon dipuseng gisa,
Meunyoe taraba bagah meureumpok,
Meunyoe bit carong rakan syedara,
Jaweub le gata puetra yang cocok..??

Jaweub : ( On Pinyueng )

Sinoe ta tigon sideh dimusu,
Sinoe meulagu sideh jideungoe,
Butoi deungon kon sigoe ta tupeu,
Aci kheun laju puetra teuma nyoe..??

Jaweub : ( Teulepon )

Karya: Cek Wandy