Selasa, 19 Mei 2015
Panton Cinta / Katem Dek Katem / Meurayu Lam Panton
~KaTeM DeK KaTeM~
Ie laot masen, jilê that teuga
Ie laot tawa, jilê meurek-rek
Katem dek katem, ta meu-en cinta
Geutanyoe dua, sigra meucewek
Ulon that galak, laju keugata
Mameh ban saka, rupa that molek
Dari phon tapak, sampe u muka
Bak ulon rasa, puteh meuplek-plek
Ka sithon leubeh, lon pantoe gata
Han teujeut sapa, haba meusikrek
Sabe ulon preh, 'oh woe sikula
Lon kalon gata, mata meublek-blek
Si malam beungoh, han teungeut mata
Rasa that cinta, keugata cewek
Ulon sang leumoh, hana meudaya
Seugolom dinda, cinta kutipek
Han ek meutheun le, lage nyoe cara
Jantong ngon dada, jimeu-en silek
Di dalam hate, meutiet-tiet raya
Sang hana daya, teuduek meukulek
Tiep saat sabe, teutaho mata
Bak mari kaca, gata meutipek
Troh dalam wece, meunan ceurita
Deuh wajah gata, sira lon toh ek
Jinoe laju le, lon ucap cinta
Lon harap gata, neutulak yang bek
Bek ragu hate, keu ulon hamba
Siap seutia, wahe dek molek
Jimusu ticem, dicong bak naga
Di yueb bak pala, rusa ji rilek
Meunyoe adek tem, neukirem haba
Neubalah cinta, keu lon duwa krek
Moga beuneutem, lage ban pinta
Ulon bahgia, hana meukeutek
Bacut ulon khem, seubagoe tanda
Seunang teurasa, tajam ngon meulek
Kasep keuh etnoe, lon rayu gata
Rap abeh kata, bak ulon gesek
Meu'ah ulon nyoe, wahe adinda
Kadang na haba, kata meu ejek.
Panton Aceh / Pantai Blang Kijue / Simpang Mamplam Bireuen
Riyeuk jimusue,,teuka geulombang,
Dalam beurawang,,eungkot meunari,
Pantai blang kijue,,indah kon wayang,
Teumpat pih rumbang,,dibineh pasi,
Barat ngon timu,,indah hana ban,
Wate neupandang,,teutarek hati,
Ban peut penjuru,,taeu pih saban,
Deungon hiasan,,bit keubit tari,
Cukop le taeu,,peurahu sampan,
Meumacam-macam,,teuduek meuriti,
Ladom peurahu,,untuk tham kawan,
Jak mita ikan,,malam ngon hari,
Na chit peurahu,,taeu piasan,
rumoh di dalam,,cukop that tari,
Mubek na ragu,,dalam pikiran,
Nyan keuh hai rakan,,bot labi-labi,
Na lom peurahu..taeu pih heran,
Dua boh sajan..saban taeu hi,
Rumoh sep hayeu,,layeu peut macam,
Nyan katek malam,,nama aseuli,
Na chit peurahu,,lucu bit heran,
Punoh hiasan,,meuwarna-warni,
Beuna neutupeu,,wahe e rakan,
Ata khususan,,muda ngon mudi,
Jeut takheun laju,,untuk hiburan,
Jak jalan-jalan,,pulang peuregi,
Jiplueng sep sulu,,keubit that tajam,
Seunang hana ban,,di dalam hati,
Meunyoe na ragu,,ngon peunasaran,
Lon persilahkan,,jeut neu-eu bukti,
Pantai blang kijue,,hana pue heran,
Bermacam-macam,,hiburan pasi,
Oh noe lon rireu,,kisah lon karang,
Ulon jak riwang,,malam ka sunyi,
Mungken siat teuk,,gabuek lon tuan,
Kawe lon kambam,,sideh dipasi,
Suwah lon jak eu,,bak poh lhee malam,
Kadang hai rakan,,jikap bubaji,
Lon akhe laju,,deungon wassalam,
Mudah-mudahan,,jumpa kembali.
Karya: Cek Wandy
Rabu, 06 Mei 2015
Panton Aceh / Peunyaket Cinta 2015~2020
Pengarang; Cek Wandy
Meugah di banda, le aneuk kiroe
Meugah le seungkoe, nanggroe meulaboh
Peunyaket cinta, kisah lam rampoe
Neudeungoe keudroe, puetra lon ratoh
Ureung seumula, dikuta panjoe
Rata jeut sagoe, geupeugleh lampoh
Yang meu-en cinta, bek beurangkahoe
Takot meupaloe, euntreuk salah bloh
Agam ngon dara, beujeut jaga droe
Aduen ngon adoe, bek kutoe tuboh
Bak meu-en cinta, kadang sigoe-goe
Tan tateupeu droe, ka teuhah bungkoh
Saweub meucinta, mandum ka meuhoe
Tanyoe dicakoe, le burong tujoh
Nafsu sep raya, han ek tajangkoe
Pulom duwa droe, taduek lam lampoh
Bak peugah haba, ceurita baroe
Cukeh bak igoe, ek mata sampoh
Meuraba-raba, duwa blah jaroe
Geusuek sigoe-sigoe, cukeh bak tuboh
Sira meuhaba, mata ka sehsoe
Sigoe-goe sahoe, mata seumeulhoh
Hana teurasa, sang-sang lam lumpoe
Tabak meu asoe, ka teuhah bungkoh
'Oh wate jaga, ka kon meuleumpoe
Gaki ngon jaroe, meukilat reu-oh
Meublek-blek mata, teutahõ keudroe
Dikubah sidroe, di dalam lampoh
Langsong keucewa, sira dijak woe
Jikliek meutampoe, ka kutoe tuboh
Hana le cara, teulah 'oh dudoe
Hanjeut tapuwoe, bak asai beutroh
Yang ka neucoba, neurasa beutroe
Na mangat asoe, atawa sungkoh
Neusaba-saba, malam ngon uroe
Neutanggong keudroe, yang ka neupajoh
Dikuta raja, ureung woet tumpoe
Yang peugoet ragoe, cupoe meulaboh
Peunyaket cinta, bit-bit meupaloe
Mubek tajak bloe, harga meureutoh
Mubek neucoba, lage ban heut droe
Takot meupaloe, wate ka putoh
Tanyoe sengsara, saket lam asoe
Sang keunong bak dhoe, duroe bak iboh
Yang dara-dara, sigra lon himboe
Beugot jaga droe, bak jalan luroh
Soal meucinta, kon hanjeut adoe
Tapi bek sampoe, lage heut tuboh
Meunyoe ka cinta, keu ureung sidroe
Tanda bak jaroe, bagah neupeutroh
Meunikah sigra, mangat seulusoe
Nyan baroe adoe, ponten sireutoh
Aneuk cem pala, dicong bak raboe
Teungoh dipantoe, si rimueng buloh
Bek neupeucaya, cinta ek igoe
Meuputie taloe, cinta di laboh
Meunyoe meucinta, janji tiep uroe
Chiet han seuleusoe, janji hana troh
Lage nyan cara, mubek neupakoe
Tuha meu keudroe, bak neupreh tanggoh
Kabeh keuh rika, haba lam rampoe
Ulon meujak woe, bekna yang kiroh
Meunyoe na haba, salah lon pasoe
Neutunyok jaroe, mangat lon sampoh.
Langganan:
Postingan (Atom)