Episode 2
~"PILEH RAJA"
Jiseu'ot ligat, ka uleh tairoe
Si eungkot paroe, taboh keuraja
Di jih cocok that, badan meu asoe
Panyang that taloe, sabe jibaba
Mubek gabuek that, jiseu-ot sumboe
Gata hai tairoe, salah keunira
Meuhi gura that, si eungkot paroe
Hanjeut tapeutoe, keu calon raja
Saban chiet meuhat, ngon gata tairoe
Mubek meulumpoe, calon pilsara
Badan that gawat, leumiek ngon asoe
Bacut meugilhoe, tijoeh ie mata
Ulon cocok that, keuraja nanggroe
Malam ngon uroe, hana meubeda
Mata lon bulat, siap meupantoe
Jioh deungoe toe, han kabor mata
Sira jilompat, seu-ot eungkot groe
Ngon eungkot kuroe, sigoe suara
Kamoe sep hebat, siap jeut meulhoe
Antara sidroe, cocok keuraja
Jiseu-ot cuka, dalam ie cikoe
Kamoe ngon paroe, na racon bisa
Pileh keu raja, kamoe nyoe sidroe
Makmu lam nanggroe, udep sijahtra
Seu-ot jeunara, sira lompat droe
Bek beurangkahoe, tapileh raja
Pileh yang teuga, keuraja nanggroe
Beu ek seulusoe, yang meusangketa
Jiseu-ot bukuem, lam riyeuk tampoe
Hana meusoe-soe, jak pileh raja
Bek meuka neukheun, kiban meuheut droe
Takot meupaloe, kachoe samudra
Ulon nyoe cocok, keuraja nanggroe
Badan meuduroe, igoe pih raya
Siap ulon kloek, meusoe yang kachoe
Kukap bak asoe, ngon igoe bisa
Beungeh jeureubok, su'um that asoe
Bukuem ek igoe, lake duek raja
Na can kuyue klok, bak eungkot paroe
Ngat jitop asoe, bek bebeasa
Dum lon yang hayeu, sinoe ku'iem droe
Hana kupeutoe, keu calon raja
Diluwa layeu, kudong bak sagoe
Teungoh kupantoe, soe-soe meudawa
Bersambong ke episode 3....!!!
Baca;
• Episode 1
• Episode 2
• Episode 3
• Episode 4
• Episode 5
• Episode 6
• Episode 7
• Episode 8
• Episode 9
• Episode 10
• Episode 11
• Episode 1
• Episode 2
• Episode 3
• Episode 4
• Episode 5
• Episode 6
• Episode 7
• Episode 8
• Episode 9
• Episode 10
• Episode 11
Tidak ada komentar:
Posting Komentar