Panton Hikayat Aceh / Pileh Raja Di Laot / Terbaru 2015 / Episode 3

Episode 3

     ~"PILEH RAJA"~

Teukijot rambeu, teungoh cot uroe
Siap ta meulhoe, adu teunaga
Meusoe yang hayeu, lam bidang meulhoe
Cocok that tuloe, taboh keuraja

Mandum ku sinteu, meusoe yang peutoe
Mandum ku ungkoe, adak pih raya
Kutinju-tinju, kugilhoe-gilhoe
Mangat jitusoe, bek kureung aja

Digee layaran, meungamok sidroe
Laju dipeutoe, jak bi suara
Nyoe pat lon tuwan, badan that suboe
Cocok bit tuloe, keusidroe raja

Ulon sep tajam, lam bidang meulhoe
Abah meuduroe, payang that raya
Mandum kuhantam, meusoe yang kachoe
Mandum ku ungkhoe, meusoe yang dawa

Teukijot tamban, teungoh meulumpoe
Gadoh pujoe droe, bak pileh raja
Lagee layaran, sit tukang kachoe
Malam ngon uroe, dijih sep subra

Langsong teukijot, si eungkot suree
Bek meu keurabee, bak pileh raja
Pileh yang patot, keusidroe ulee
Contoh lagee kee, cocok that raya

Jikhem meulikot, si eungkot seudee
Jikalon suree, lakee duek raja
Jadeh sang laot, jitimoh kayee
Meunyoe bit suree, yang mat kuasa

Sira jigrop-grop, jiseu'ot badee
Bit-bit tan malee, suree cilaka
Na can sang kukhop, dijih uleh kee
Saweub dilakee, jak duek keuraja

Haba disambot, uleh khan tapee
Meu asek ulee, lage nyan cara
Ulon yang patot, pileh keu ulee
Seubab ka teuntee, dikee seutia

Beungeh bubaji, meu asek ulee
Di eu khat tapee, lakee duek raja
Na can kubati, laju ku singkee
Mangat meusubee, lam mieng kuala

Langsong dibantah, uleh eungkot yee
Suree khan tapee, hanjeut duek raja
Ulon that gagah, abah bideung lhee
Cocok that dikee, yang mat kuasa

Seu-ot khan gapah, ngon kupah tubee
Sigoe ngon mutee, jibi suara
Cocok sileumpah, raja eungkot yee
Kamoe nyoe ban lhee, ikot seureuta

Mandum hana pah, jiseu-ot sabee
Kajeut kagesee, bek le meucuca
Tingkat awak kah, hanjeut duek ulee
Bek kajak lakee, keucalon raja

   Bersambong.......!!!

Baca;
 • Episode 1

 • Episode 2

 • Episode 3

 • Episode 4

 • Episode 5

 • Episode 6

 • Episode 7

 • Episode 8

 • Episode 9

 • Episode 10

 • Episode 11

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??