Episode 7
~"PILEH RAJA"~
Jiseu-ot ciriek, dalam ie puteh
Bek salah pileh, keucalon raja
Takot jeut reuhiek, hukom meulanggeh
Geutanyoe abeh, udep sengsara
Seu-ot khan kawet, sira keuruweh
Ulon neupileh, neucok keuraja
Mandum ku cupet, meusoe meulanggeh
Kupasoe lam keh, yang peudong dawa
Beungeh di reumong, lam kaye sideh
Bek kajak pileh, khan kawet sukla
Hana meukeunong, 'oh dikeuruweh
Badan meugareh, lipeh that raya
Teuka di rapeung, jigrop beureuteh
Ulon neupileh, keu sidroe raja
Lon kuprak iseung, sira koh lipeh
Keubit seumateh, han lon meudawa
Jiseu-ot krak u, harus yang meuceh
Bek salah pileh, keu sidroe raja
Mubek meukru-kru, wate neupileh
Meunyesal abeh, tanyoe binasa
Seu-ot beudame, lam riyeuk sideh
Salah ta pileh, laju bahaya
Mubek meupa'e, hukom meucureh
Rotnoe ngon rotdeh, bekna sangketa
Jiseu-ot meuneng, sira di eh-eh
Han meujan abeh, ta pileh raja
Dikee ka reuneng, mumang beureuteh
Soe keuh kupileh, sidroe ketua
Di sala kuneng, saban peureuseh
Tan muhoe pileh, lagenyan cara
Ulee pih kaheng, meuangen lapeh
Jadeh meupayeh, dalam kuala
Jiseu-ot muloh, bek gadoh ilhap
Bek sampe silap, bak tiek suara
Ulon nyoe neuboh, tuboh cukop gap
Cocok neu anggap, keusidroe raja
Alah hai muloh, seu-ot siakap
Bit-bit that geupap, bak peugah haba
Lagee kah tuboh, peugah cukop gap
Tan troh sigoe kap, meunyoe kee taga
Seu-ot khan teunga, hana le aman
Mandum awak nyan, ka jimeudawa
Bek gabuek teuma, seu-ot khan leman
Chit ka lagenyan, bak pileh raja
Jikheun le timphiek, butoi lagenyan
Mandum awak nyan, bekle peucaya
Mubek le tatiek, suara keunan
Bah meunan sinan, jimeu-en dawa
Bersambong.......!!!
Baca;
• Episode 1
• Episode 2
• Episode 3
• Episode 4
• Episode 5
• Episode 6
• Episode 7
• Episode 8
• Episode 9
• Episode 10
• Episode 11
• Episode 1
• Episode 2
• Episode 3
• Episode 4
• Episode 5
• Episode 6
• Episode 7
• Episode 8
• Episode 9
• Episode 10
• Episode 11
Tidak ada komentar:
Posting Komentar