Panton Hikayat Aceh / Pileh Raja Di Laot / Terbaru 2015 / Episode 10

Episode 10

          ~"PILEH RAJA"~

Kheun asu-asu, dalam ie surot
Ulon yang patot, keu sidroe raja
Igoe lon cincu, meu iku sipot
Mandum teumakot, dikalon rupa

'Oh ban jitupue, uleh bieng laot
Langsong teukijot, meutaga-taga
Dak jeut si asu, laju ku beu-ot
Kumat bak janggot, kutampa-tampa

Ulon sep hayeu, dumpue meubawot
Jaroe ngon tu-ot, meukawat baja
Tingkat si asu, golom kutakot
Hideh lam supot, ku kret bak mata

Keu raja nanggroe, ulon yang patot
Maju ngon surot, ulon lumboi sa
Badan lon busoe, suboe bruek tu-ot
Han soe teujeut dhot, jak peudong dawa

Jikhem si jalue, laju meulikot
Di eu bieng laot, beungeh that raya
Troh bak si asu, dilake beu-ot
Ulon teumakot, meudhuep-dhuep dada

Teuma si capa, teuduek meulimbot
Diwa ngon tu-ot, takot that raya
Meubacut haba, hana diseu-ot
Dingieng bieng la-ot, meuhi drakula

Jikhem khan tanda, di dalam supot
Laju di seu-ot, meubuet beutiga
Masalah raja, han bla dimeulot
Meuseu-ot sambot, hana pre dawa

Simirah mata, sigra di seu-ot
Cocok bieng laot, taboh keuraja
Di jih sep teuga, badan meubawot
Cocok bit patot, dijih ketua

Sep raya dikhem, mudem lam bakat
Pue ka ditakat, simirah mata
Pue hana laen, raja yang hebat
Yang leubeh kuat, dari bieng bangka

Seu-ot seulangat, lam riyeuk jungkat
Haba mangat that, jibi suara
Rayek that rahmat, ubena rakyat
Meunyoe neuangkat, ulon keuraja

Jiseu-ot taleung, sira jilompat
Bit keubit gawat, takalon nyata
Meukreuh-kreuh tuleung, taeu dum rakyat
Meuhebat-hebat, bak pileh raja

Seu-ot keurimen, lam riyeuk bulat
Pakon karu that, bak calon raja
Mubek jak meu-en, bak bi pendapat
Pileh beu teupat, yang meu wibawa

Jiseu-ot boh bi, bak tanoh liyat
Karu tamah brat, nyoe tan tapubla
Kiban solusi, wahe e rakyat
Aci peutupat, bek jeut le dawa

Si rambeu haji, jibi pendapat
Dak jeut sahabat, bekle meudawa
Raja yang pasti, golom ta tupat
Sampoe inohat, mantong meuputa

           Bersambong.......!!!

Baca;
 • Episode 1

 • Episode 2

 • Episode 3

 • Episode 4

 • Episode 5

 • Episode 6

 • Episode 7

 • Episode 8

 • Episode 9

 •Episode 10

 • Episode 11

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??