Panton Hikayat Aceh / Pileh Raja Di Laot / Terbaru 2015 / Episode 1

 
"Assalamu'alaikum wr.wb"
      Pue haba rakan mandum yang na di peut penjuru nibak saat nyoe,
semoga ureung droeneuh sehat-sehat mandum inong ngon agam tuha muda.

    Jadi, jinoe lon meuneuk ceurita saboh kisah keugura-gura sambil lon latih droe dalam bidang meusastra, teuma kisah nyoe merupakan kisah dongeng yang cukop aneh mungken golom neudeungoe sigolom jih.

    Mula ceurita jih gara-gara pendatang asing dijak peukachoe saboh nanggroe yang dihuni uleh eungkot yaitu nanggroe laot. Sehingga ubena eungkot yang na dilaot jipeuduek rapat untuk jipileh raja dan sebagai jih mangat na yang tukang meuato lam saboh nanggroe awak nyan.

  Dimiyup nyoe neubaca laju ceurita jih kalheuh lon suson deungon rapi, dan meunyoe na meureumpok keusalahan dalam ceurita nyoe, sigra laju neubi koreksi dipat mantong yang hana cocok.
  Oke..langsong laju neubaca kisah yang judul jih "PILEH RAJA" (Pilsara = Pileh Sang Raja).
          
      Peungarang: Cek Wandy

Episode 1

        ~"PILEH RAJA"~

Jibeudoh bakat, sideh ipasi
Riyeuk meunari, hana tom tudoh
Dijak siat-at, bot labi-labi
Meu ula ili, pukat jilaboh

Teuka rame that, bot luwa negri
Aceh provinsi, keunoe dipiyoh
Na yang beurangkat, dari itali
Na dari turki, keunoe dikayoh

Ladom siet meuhat, dari miami
Daerah idi, kayem di saoh
Ladom jitakat, dari banggali
Di pulo nasi, jiputa aroh

Keubit jai that-that, bot luwa negri
Ôh malam sunyi, keunoe dum dibloh
Timu ngon barat, abeh di lobi
Hana ta turi, dari pat dum troh

Meugah rame that, eungkot meunari
Laot seurambi, han putoh-putoh
Maka siat-at, dijak pancuri
Watee ka sunyi, pukat jilaboh

Mandum jitakat, pat yang dibati
Mandum jicari, pat yang na kiroh
Ubena tempat, kabeh di ungki
Mandum lokasi, pukat jilaboh

Rasa sayang that, takalon dali
Bijeh eungkot tri, kabeh dibungkoh
Bit-bit meukarat, eungkot dipasi
Tan muho ili, tan mupat piyoh

Si beuleun meuhat, eungkot ka seu-i
Mita solusi, neuk lawan musoh
Ka jimeupakat, kiban yang pasti
Cara jilobi, bek mate tuboh

Jipeuduek rapat, bak teumpat sunyi
Lam kareung hanyi, sinan meuratoh
Ka jimeupakat, deungon diskusi
Laot ta huni, peumimpin taboh

Tapileh leugat, taeu yang ahli
Jabatan tabi, sesuai tuboh
Raja keu phon that, pileh beumeukri
Yang bi solusi, sidang peuputoh

Sigohlom meuhat, taneuk mulayi
Buhue lam rawi, laen ulon boh
Bareh keuphon that, tan le mate i
Kubalek sundi, ngon laen huroh

Bareh keuduwa, meutuka bunyi
Meupruet meu isi, huruf a lon boh
Wate tabaca, ngat muhoe rawi
Jalan aseuli, han salah tabloh

                   Bersambong.....!!!

Baca;
 • Episode 1

 • Episode 2

 • Episode 3

 • Episode 4

 • Episode 5

 • Episode 6

 • Episode 7

 • Episode 8

 • Episode 9

 • Episode 10

 • Episode 11

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??