Panton Hikayat Aceh / Pileh Raja Di Laot / Terbaru 2015 / Episode 4

Episode 4

        ~"PILEH RAJA"~

Sideh lam riyeuk, disu-ot lupoh
Bit-bit that kiroh, bak bi suara
Yoh goh kujithuek, iseuk beujioh
Bek kajak ratoh, yang kon-kon haba

Teumpat raja duek, di kursi gaboh
Aci neusampoh, ban si seulingka
Mungken siat treuk, ka teuduek lupoh
Sinan meupiyoh, kajeut keuraja

Jiseu-ot eunggeuk, lam riyeuk teudoh
Alah hai lupoh, raya that haba
Badan cukop ruek, meuhi ek kawoh
Ka teujeut ratoh, jak peugah raja

Ulon that garang, ngon panyang tuboh
Ku grop sep jioh, han soe ek kira
Cocok that rumbang, keuraja neuboh
Mandum ku sampoh, yang meusangketa

Teuka khan pisang, lam bakat riyoh
Jitubiet reu-oh, jikhem sep raya
Si eunggeuk sawan, badan sep rapoh
Ji teujeut ratoh, yue boh keuraja

Beungeh that khallang, lam rawang aroh
Pakon sep riyoh, gadoh meudawa
Bek jak meuayang, wahai bujoh bloh
Keuraja neuboh, yang na etika

Teuma dijaweub, uleh geurupoh
Ulon nyoe neuboh, keu sidroe raja
Cukop meusaneut, 'oh neu-eu tuboh
Jitubiet boh goh, keubit that raya

Ulon sep meuheut, keuraja beutroh
Hajat lam tuboh, laot kujaga
Meunyoe jadeh jeut, janji lon peutroh
Beumaju sunggoh, dalam keurija

  Seu-ot eungkot cuet, teungoh seumajoh
Ulon nyoe katroh, bekle meudawa
Walau lon ubeut, badan sep haloh
Cocok that neuboh, ulon keuraja

Ulon dumpue jeut, dak pijuet tuboh
Sanggop kusuroh, yang badan raya
Mandum ku cuet-cuet, meusoe yang kiroh
Mandum kubungkoh, yang peugah teuga

      Bersambong.....!!!

Baca;
 • Episode 1

 • Episode 2

 • Episode 3

 • Episode 4

 • Episode 5

 • Episode 6

 • Episode 7

 • Episode 8

 • Episode 9

 • Episode 10

 • Episode 11

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??