Episode 5
~"PILEH RAJA"~
Teukijot gantuep, dikhem meugok-gok
Si cuet ek catok, lake duek raja
Badan jih ubeut, be pateng rukok
Sit hana cocok, jih mat kuasa
Ji khem meukhik-khik, si eungkot turok
Si cuet ek catok, lake duek raja
Na can kutijiek, kutiek lam padok
Sinan ku gitok, bek bebeasa
Ulon troh sampoe, hai budoe culok
Keubit that cocok, neuboh keuraja
Badan lon busoe, kreuh lage tembok
Hana soe ek pok, dak badan raya
Jiseu-ot bileh, lam riyeuk krek krok
Bek salah tacok, keucalon raja
Meunyoe tapileh, si eungkot turok
Jadeh jimeuklok, rampueng ngon kadra
Akai jih paleh, abudo culok
Mandum digitok, yang hana daya
Lage kee bileh, badan teuleung tok
Sabe jipicrok, meutaga-taga
Butoi hai bileh, jiseu-ot bagok
Bit keubit cocok, kabi suara
Hanjeut tapileh, si eungkot turok
Abeh disudok, meusoe yang hawa
Jiseu-ot cabeh, dalam ie crek crok
Bek that ka meuklok, bak calon raja
Bek kajak pileh, yang hana cocok
Kutakot cikok, hukom binasa
Mubek ka pileh, meunyoe tan cocok
Dikee tan harok, seu-ot peulata
Kutakot abeh, rakyat dum diklok
Ulee digitok, kiban yang suka
Teuka ciriek khak, dikhem deungon dok
Ji kalon turok, keunong seurapa
Tan le meuhoe jak, hana mupue cok
Ka di keuroyok, membabi buta
Laju jisurak, uleh si tok-tok
Sideh lam alok, jikhem meu ha-ha
Iku dikuprak, di ulok-ulok
Ka di peugot blok, lidah uluwa
Di ciriek buju, ulee meukundok
Di kalon turok, teurasa iba
Hanjeut kubantu, wahe e turok
Meusibak rukok, hanjeut ulon ba
Tapak sipatu, laju ka 'ek-'ok
Lam ie meuguyok, teungoh jitafa
Pakon that karu, sinan lam alok
Gop-gop salah cok, bak baca mantra
Bersambong.......!!!
Baca;
• Episode 1
• Episode 2
• Episode 3
• Episode 4
• Episode 5
• Episode 6
• Episode 7
• Episode 8
• Episode 9
• Episode 10
• Episode 11
• Episode 1
• Episode 2
• Episode 3
• Episode 4
• Episode 5
• Episode 6
• Episode 7
• Episode 8
• Episode 9
• Episode 10
• Episode 11
Tidak ada komentar:
Posting Komentar