Panton Hikayat Aceh / Pileh Raja Di Laot / Terbaru 2015 / Episode 11

Episode 11

           ~"PILEH RAJA"~

Seu-ot sileumiek, hideh lam bakat
Pakon karu that, bak pileh raja
Meunyoe golom chiek, mantong bei kulat
Bek jak meuhajat, keu sidroe raja

Lage lon tuan, badan meu urat
Cocok keubit that, keu sidroe raja
Siap ku lawan, meusoe yang batat
Siap ku takat, meusoe yang dawa

Seu-ot lamahan, sinan di teumpat
Han meujan tupat, lage nyoe cara
Kiban keuh teuman, kubi pendapat
Ulee saket that, yang ulon rasa

Troh lumba-lumba, teuka di barat
Jibi pendapat, bekle meudawa
Ta ilah daya, peu damee leugat
Meusoe keuh meuhat, keu sidroe raja

Teuma di damee, uleh eungkot deut
Langsong eungkot cuet, taboh keuraja
Walau jih badan, haloh ngon ubeut
Mandum ek dicuet, yang badan raya

Teuma keu waki, taboh bieng laot
Di jih bit patot, keuwaki raja
Badan sep ngeri, kulet meubawot
Cocok tabeu-ot, peudampeng raja

Meunyoe keu mentri, si eungkot lupoh
Man saboh tuboh, jarom di baba
Langsong eungkot tri, keu hakim taboh
Tukang peuputoh, sidang peukara

Teuma bupati, pileh geurupoh
Raya that tuboh, carong sikula
Eungkot bubaji, peutani taboh
Yue jaga lampoh, deungon kucuka

Si lumba-lumba, etika got that
Cocok ta angkat, keu tukang ronda
Eungkot jeunara, keu guree silat
Meunyoe peujabat, mesti jeunada

Bapak gubernur, taboh keurapee
Politik jithee, keudeh u luwa
Meunyoe pak camat, si eungkot suree
Carong that lagee, gopnyan meuhaba

Meunyoe si ciriek, keu geuchiek gampong
Teuma kikirong, keu bapak WeHa
Gantuep yang kachiek, keupala lorong
Keupawang tekong, simirah mata

Keu bapak sekdes, taboh jeureubok
Si eungkot turok, guru sikula
Ileumee leubeh, eungkot khampilok
Di jih sep cocok, keu pak K.U.A

Teuma Keurumbuek, keu ibuk bidan
Lagak that badan, tari ngon rupa
Meunyoe si eunggeuk, jeut keupahlawan
Keupanglima prang, si pa'ak raya

Taboh eungkot yee, tukang algojoe
Mandum di ungkhoe, hana dikira
Tukang teumipee, taboh eungkot groe
Meu macam bagoe, taktik di mita

Tukang teuropong, si eungkot sumboe
Musoh di pantoe, ngon kacamata
Pat-pat yang jidong, mata jih seh-soe
Jioh deungon toe, mesti waspada

Eungkot khan terbang, tukang patroli
Peugot keu heli, lewat udara
Si eungkot khallang, jabatan tabi
Cocok seukali, keu mata-mata

Keu teungku imum, si rambeu haji
Carong meungaji, gopnyan aleh ba
Teuma si bukuem, keu abu pasi
Cocok seukali, jaga kuala

Si eungkot rambeu, peugawe negri
Bapak polisi, eungkot peulata
Tapak sipatu, jabatan tabi
Cukop seurasi, dijih keu teuntra

Etnoe keuh haba, damee ulon bi
Lon neuk keumbali, dalam ie tawa
Bang deut jak gisa, meu'ah beu neubri
Kalheuh lon bagi, jabatan raja.

              "**TAMAT**"

Baca;
 • Episode 1

 • Episode 2

 • Episode 3

 • Episode 4

 • Episode 5

 • Episode 6

 • Episode 7

 • Episode 8

 • Episode 9

 • Episode 10

 • Episode 11

SALEUM MEUTURI saleum meuturi SALEUM MEUTURI saleum meuturi SALEUM MEUTURI

Kiban rakan, pue haba uroe nyoe ..??